Awe nochi pa 8:30pm a activa polis di Noord pa presenta mesora na Washington # 42-K pa un tata burachi cu a lanta cu su yiunan den cas. Mirando cu ultimamente violencia domestico ta lantando cabes atrobe, ta pone cu polis ta actua rapido y cu man duro. Ta hopi famia ta biba den sufrimento pa motibo di abuso den cas, specialmente pa motibo di droga y alcohol.
Na e sitio polisnan a compronde cu e tata a yega cas betra y a cuminsa haci fastioso. El a start un discusion pisa cu su mesun yiu muhe. Ora cu e yiu muhe a yama su ruman chikito pa bin busc’e, e tata a gar’e na su garganta y a dal su cabes riba auto. E yiu muhe tabata gritando di dolor pasobra su tata a hinca dede den su wowo!
Net na e momento ey dos homber tabata pasando dilanti e cas y a tende y mira con e yiu muhe tabata sclama di dolor con e tata tabata maltrat’e. E dos hombernan a core kita e yiu muhe di e tata y na un forma masha tactico a pone su cabes na “waterpas” mesora y mand’e suela abou.
A yama polis pa bin busca e homber cu tambe a haya poco corta na cara den e proceso pa e bay suela. Polis a yega cu transport’e special pa hiba e homber wardi’i polis na Noord. E homber tabata asina burachi cu di baina e por a subi e vehiculo di polis. Lo present’e dilanti un Sub Fiscal cu lo dicidi si e ta pasa anochi den cel na warda di polis of na cas. Probablemente, pa evita mas maltrato di su famia, lo lag’e descansa su curpa bon y pasa wayaba den cel.
