Polis a detene e ambtenaar Sergio van der Biezen, un trahado di Cuerpo Especial Arubano, cu un arma di candela den su auto y a menasa un homber cu morto. Esaki a sosode pa mas of menos 7:30pm den Wing Hung Bar & Restaurant na Ponton. Varios unidad di polis a yega na e sitio pa deten’e y su dos amigonan. Tur tres tin cu duna cuenta awo pa portacion di arma di candela y menasa di morto.
Di acuerdo cu e victima, parce cu e ambtenaar aki, Sergio van der Biezen, ta doño di un compania di construccion tambe, Serald Construction & Services. E homber a traha p’e, pero e no a pag’e pa dos quincena sigui, balora na 2500 florin. Riba dje, el a fia su mesun doño di trabou 650 florin tambe, cu ainda e no a haya paga bek.
Awe e trahado a pasa pa casualidad banda di Wing Hung Bar & Restaurant y a topa cu e auto di su doño di trabou, un Nissan March color blauw numera A-71294 para eyfo. Mesora el a baha pa mira si awe ta su dia di suerte y cu e por cobra porfin. El a topa su hefe sinta na bar ta bebe y a puntr’e pa su salario y e prestamo haci. Sergio van der Biezen a saca 300 florin cash mas 20 dollar duna su trahado. El a bisa cu e no tin mas, pero e trahado a insisti cu e mester su salario, pasobra e debe huur di apartament y otro gastonan mensual cu no por warda mas riba dje.
Ey a start un intercambio di palabra y den e proceso, dos hoben sinta banda di Sergio van der Biezen a lanta cu e trahado. Nan a bay pafo y hunto cu Sergio a cuminsa menasa e homber cu nan lo “bal’e”. Den e proceso, nan a cuminsa coba bou sienta di e auto y a mustr’e un arma di candela, pa intimid’e. Ta net na e momento ey, manda pa Dios, un patruya di polis a yega di sorpresa riba e trio. Ora a controla e auto, a bin topa cu un arma di candela bou di e sienta, cu ta cuadra cu locual e trio a menasa e homber cu nan lo mat’e.
Polis a detene tur tres y a transporta nan den dos vehiculo separa, pa evita cu nan por papia cu otro of acorda kico lo declara na autoridad. A tuma e auto den beslag y a laga Takelwagen bin busc’e pa transport’e pa ward’i polis pa ey sigui cu investigacion. Lo mester tuma “fingerprints” riba e arma pa por deduci exactamente di ken e ta y ken a mishi cu ne prome cu scond’e bou di e sienta di auto.
Tambe lo mester interoga tur tres awo pa compronde kico nan plan tabata awe. Pakico tres hende homber lo sali arma pa bay bebe den bar, kico ta e intencion anto? E hecho cu Sergio van der Biezen ta un ambtenaar, specificamente trahando pa husticia di nos pais, ta haci su caso mas pisa ainda y sin duda Fiscal lo mira e acusacionnan cu un wowo mas skerpi. Publico mester por tin confiansa den empleadonan publico y specialmente esunnan trahando den “ordediensten”.
