Coalicion ta conta cu solamente 11 miembro, locual ta haci nan masha vulnerabel. De facto nan tin un mayoria limita y asina cu un persona no t’ey, nan no tin quorum mas, cu ta stroba reunionnan y decisionnan importante di nos pais. Awe Ricardo Croes di RED a bandona reunion cu a haci cu mester a para e reunion. Henter conseho di minister sinta den sala di parlamento pa contesta preguntanan, pero toch no por a sigui debi cu no tabatin suficiente parlamentario den sala, ni di coalicion mes!
Ta trata di un reunion masha importante, pa atende cu presupuesto supletorio di nos pais. Un rato pasa a avisa cu lo start e reunion di nobo pa 6:00pm.
E reunion a start awe mainta 9:00am cu suficiente miembro den sala, incluyendo parlamentarionan di oposicion, esta AVP y miembro independiente Daphne Lejuez. Merdia a suspende e reunion un rato pa parlamentarionan y ministernan por a come un rato. A reanuda despues pa ministernan por caba di contesta preguntanan y asina cuminsa cu e di dos rond.
E reunion pa pasa e presupuesto supletorio di nos pais ta algo normal. E ta e deficit cu tin den locual a presupuesta na cuminsamento di aña, banda di e realidad di gastonan. E aña aki sinembargo gobierno a logra baha e presupuesto aproba, pues enbes di gasta 1.4 biyon florin cu nan a presupuesta pa aña 2020, nan lo gasta solamente 1.2 biyon. Ta logrando esey debi cu e entradanan di gobierno a resulta miho di locual a spera, cu consecuencia cu e deficit financiero tambe a bira menos.
Ta bon pa bisa cu e falta di quorum ta e mesun motibo dicon presidente di parlamento mr. Juan “Ady” Thijsen a hay’e ta cancela e mocionnan cu el a pasa siman pasa, pasobra e tabatin solamente 10 miembro den sala. E tempo ey el a defende su decision bisando cu esey por, debi cu e parlamentarionan a yega na un areglo pa permiti reunionnan tuma luga cu menos di 11 hende den sala, debi na Covid-19. Ta resulta cu tur e parlamentarionan a faya ora di cera e acuerdo aki pasobra e ta invalido y ilegal!
Un rato pasa e griffier di parlamento a manda yama e reunion di nobo pa 6:00pm, pa por keda cla awe nochi ainda cu e reunion aki. Tin varios departamento y instancianan, manera por ehempel Serlimar, cu ta wardando riba e reunion aki pa haya fondonan necesario pa por sigui opera normal. Si no pasa e presupuesto supletorio, probablemente trahadonan lo no por cobra e fin di luna aki.
Di otro banda, for di parlamento nos a tende di por lo menos dos miembro, cu e decision di Ady Thijsen un rato pasa tabata straño, pasobra si djis a puntra unda Ricardo Croes ta, lo a haya sa cu e tabata den edificio. Locual si a sosode ta cu AVP y Daphne Lejuez tabata den nan oficina y tabatin e ora solamente 10 miembro so den sala sinta.
Loading…
Reload document 
Open in new tab Kisas Thijsen kier a duna Ricardo Croes un les, cu si kier critica reglamento di orden den parlamento publicamente, manera a haci algun dia pasa, anto e ora mester cumpli cu ne tambe. E cu cumplimento cu e regla ta encera cu na tur momento mester tin por lo menos 11 miembro den sala sinta pa e reunion por continua. Asina cu un miembro di coalicion sali, e reunion mester para mesora!
