Landamento escolar, manera cu a anuncia den un articulo anterior, ta algo sumamente importante pa comunidad, en particular pa esnan cu no tin e manera pa tuma lesnan priva.
Jasmine Kelly, ta maestra di IT na Cacique Macuarima School y e ta splica cu prome cu e tabata IT, e tabata tin 14 aña den klas 3, unda cu tur siman nan tabata bay landa.Ta wak e mucha con e ta desaroya, con e ta participa, con e ta bay dilanti y e ta hopi importante.
Na Aruba tin mayor no tin e posibilidad pa bay un curso priva di lantamento, pero cu landamento escolar, e ta un principio di un carera cu landamento pa full nan bida cu nan por ta proteha y cu Aruba ta rondona pa awa.
Tur eseynan ta yuda pa e desaroyo tambe di e mucha. Kelly ta sigui splica cu e mes tin un experiencia bunita, caminda cu tabata tin un alumno cu no kier a drenta den pool. A motiv’e, casi a carg’e hink’e den pool y despues di hopi aña, el a aparece na scol bek y a gradici. El a bisa na e docente, cu danki cu a stimul’e, e ta trahando na un di e watersportnan. No por pensa, pero esey hasta a bira su profesion.
Ta haya hopi otro mucha cu ora nan a cuminsa na scol, a cera conoci cu landamento y despues e mayornan ta sigui hiba nan, pasobra e muchanan mes ta keda motiva cu e landamento. Milly Arends ta coordina e programa di Landamento Escolar den e scolnan basico klas tres y a comenta cu por fin nan a cuminsa bek, despues di hopi contratiempo. E ta sigui splica cu ora cu a cuminsa cu e programa, a studia e pakico, cua ta e miho edad, dicon e 3de klas. E muchanan aki ta mas grandi caba, nan ta disciplina. Motorisch, nan coordinacion pa siña schoolslag ta optimal den 3de klas cerca muchanan di 8 pa 9 aña.
Si haci’e den kleuter, no tin tur esakinan. E ta bira hopi mas dificil pa muchanan den kleuter, siña landa. Diploma no lo logra. Y despues di 1 pa 2 aña si mayornan no hiba nan lama, nan ta lubida tur cos. Arends no ta mira e motibo pakico haci’e den kleuter. E miho edad ta keda den 3de klas. Awor aki a extende e programa aki te cu december. Arends a splica cu no tin claridad riba esaki. Un rato ta bisa un cos, otro rato ta bisa otro. No sa kico gobierno ta dicidi pa haci. Ultimo cu sa, kier bin cu Landamento Escolar pa 2de kleuter, cual no ta hay’e optimal pa haci esaki. E programa aki tin 29 aña ta draai asina bon y no ta mira un motibo pakico cambia e programa aki.
Awor aki, segun Arends, e tristesa aki e personal ta trahando asina hopi aña largo, pero nan no ta vast. Tin hende riba contract pa 29 aña largo. Awor aki a indica na nan pa nan busca nan derecho y pa drenta den vaste dienst. Na oficina ta purba di mantene e proyecto aki den 3de klas. Rodwin Kock, ta un instructor di Landamento Escolar pa 11 aña. E ta certifica pa traha cu muchanan diploma A y B.
Motibo cual Kock ta pensa cu landamento no mester ta elimina ta, cu ta inverti bek den nos hubentud cu ta e muchanan. Ta duna nan les di landamento. Como deporte ta bisa cu landamento ta hopi esencial pa motibo cu si un mucha cay den awa, e por defende su mes.
Actualmente tin un conflicto na unda cu minister Lampe kier elimina landamento escolar of nan kier introduci’e den kleuterschool. Kock no ta di acuerdo cu esaki, pasobra estudionan a keda demostra unda cu landamento escolar ta miho basa riba 3de klassers, mirando cu e muchanan ta un poco mas independiente y structura, unda cu nan ta obediente caba, nan ta haya diferente disciplina, no solamente na cas, sino na scol tambe.
