Diahuebs, 7 di september, a tuma luga un refreshment training pa dr. Hosein, kende a duna un entrenamento n’e specialistanan den e sector social.
Dr. Hosein no ta un persona desconoci na Aruba, pa motibo cu durante e temporada di pandemia, tabatin un seminario cu a tuma luga online, mas of menos dos aña pasa.
Awo lo bay tene un seminario pa refresca e conocemento, cu un duracion di un dia, pa esunnan cu a participa den e seminario anterior, esta dos aña pasa.
E meta di e training aki ta p’e specialistanan haya conocemento con pa organisa un campaña dirigi riba cambio di comportacion di su grupo meta. Y e participantenan lo siña traha un plan strategico di comunicacion dirigi pa sosten di e mayornan.
Dr. Everold Hosein, un specialista di comunicacion internacional, como tambe un consehero di e Organisacion di Salud Mundial (WHO) y UNICEF riba tema di comunicacion, ta orador pa un seminario cu lo bay tuma luga na Aruba.
Ta organisa e seminario aki den colaboracion cu Gobierno di Aruba y UNICEF di Hulanda. Lo bay dialoga entre otro riba con pa desaroya campaña publico di comunicacion cu por forma un actitud diferente, na luga di bin cu un campaña di comunicacion cu solamente ta solamente informa hende. Tin un diferencia entre e tipo di comunicacion aki. Loke lo enfoca riba dje ta pa esfuerso di comunicacion pa lo yuda hende tuma otro direccion di comportacion pa loke ta trata educa un yiu.
Loke lo haci ta acudi na comunidad y basicamente puntra (en particular mayor y mucha), kico nan ta pensa riba e comportacion di educacion di mayor cu nan ta recomenda cu por logra pa desaroya un ciudadano Arubiano ehemplar.
Dr. Hosein a indica cu e no ta sigur cu lo bay bin cu mas seminario, aunke e posibilidad t’ey pa comparti plan di comunicacion y haci modificacion basa riba e feedback cu lo haya di gobierno y e demas organisacionnan social cu lo ta trahando cu nan.
Ta spera cu por bin cu mas discusion ki tipo di esfuerso di comunicacion por tin p’e cambio di comportacion pa loke ta miho educacion di mucha y hoben na Aruba.
E IDEA DI SEMINARIO
Stan van Haaren, specialista riba derecho di mucha di UNICEF Hulanda, a comenta cu for di 2018 a pidi pa brinda steun n’e fortalecemento di e sistema di proteccion pa hoben na Aruba door di Gobierno.
A cuminsa cu Codigo di Proteccion cementando tur profesional cu ta traha cu mucha y cu ta sospecha cu tin abuso y violencia contra mucha y sa kico nan mester haci na momento cu nan detecta esaki.
Fuera di esey a bin ta desaroya un herment cu lo brinda n’e profesionalnan pa tuma e pasonan corecto. Esey n’e momento cu tin un caso di abuso contra mucha y kico por haci pa preveni ora cu tin abuso di mucha.
A tene combersacion cu Opvoedcommissie como tambe e division pa tin miho sosten. E training aki ta parti di e division aki (Opvoedondersteuning) pasobra mester bay comunica cu mayor riba e puntonan cu nan ta haya importante y cu tambe ta cuadra riba e desaroyo cu nan lo kier sigui duna.
Segun Van Haaren e intension ta cu e seminario aki cu a cuminsa p’e formacion di un plan di comunicacion te cu otro siman, unda cu lo haci pregunta na varios mayor den bario y sa kico nan lo kier, loke pa nan ta importante y den ki manera nan ta haya cu mester comunica cu nan.
Lo por bin un plan pa futuro cu lo bay ta ehecuta, tambe relaciona cu dr. Everold Hosein.
Yvonne Geerman-Bermudes ta coordinador di Centro pa Hoben y Famia y a comenta cu hunto cu henter e veld social nan a bin hunto unda cu a tuma un biaha mas un refreshment course fo’i dr. Everold Hosein.
E curso ta financia p’e cooperacion cu tin cu UNICEF Nederland, cual ta un cooperacion hopi estrecho cu tin fo’i aña pasa, unda cu ta trahando cu nan pa bin cu un plan strategico p’e comunidad di Aruba riba tereno di ‘positive parenting’, esta lantamento di mucha den un forma positivo.
Henter e ekipo di Centro pa Hoben y Famia, cual ta Fundacion Pa nos Muchanan, Departamento di Asunto Social, Wit Gele Kruis, Tienda di Educacion y Fundacion Respetami, hunto cu e veld, cual dos aña pasa a logra haya un curso caba di dje di ocho dia.
Awo henter e veld aki ta haya chens pa participa na un refreshment course y despues di esaki lo ta te cu otro siman diabierna bezig cu ne, pa despues bay den comunidad, haciendo entrevista y asina colecta informacion p’e por traha un plan di mercadeo efectivo cu por bay ofrece e mayornan e informacion aki cu nan lo ta desea, pero cu lo tin efecto tambe a largo plaso.
