Diaranson alrededor di 8:30 pm, dos piscado local a mira un luz sospechoso riba lama. Inmediatamente polis a dirigi nan mes direccion Rancho Daimari. Prome pensamento tabata cu lo ta trata di boto ilegal cu ta purba drenta nos isla. Polis a bay cu varios unidad y asina a cuminsa un buskeda den e area. A baha te banda di e rancho y di ey a cana rond pa tira un bista den e mondi cu tin den cercania,
Despues di basta rato cu e polisnan tabata busca, a dicidi di bandona sitio. Na memento cu e ultimo patruya a subi caminda bek, helicopter a yega pa continua cu un buskeda den e area. E helicopter a nota algun movecion, esey a haci cu e patruyanan a bolbe bek. E polisnan a bolbe baha p’asina topa cu algun persona cu tabata cana den scuridad direccion Rancho Daimari.
Ora e grupo a yega Rancho Daimari, polis a cnotrola nan. A resulta cu ta trata di un trio local cu tabata pisca band’i e barancanan. Pa siguridad polis a controla tur pertenencia como tambe ID. Segun por a compronde, ta trata di tres hoben cu ta biba cerca di e rancho y ta custuma di bay pisca den anochi. Ora cu polis a sigura cu tur cos ta na ordo a laga e hobennan sigui nan caminda pa cas.
