Dialuna anochi a tuma luga un momento hopi special pa e bario di Dakota. Aki ta caminda cu un grupo di amigo cu ta yama nan mes; Dakota Boys a inaugura un plaza. Ta trata di Plaza Jose Dania. Un gran Dakotero cu merece pa ricibi su espacio special den curason di Dakota. A inaugura e plaza cu un borchi masha grandi cu su cara den skina di Shimarukustraat. Papito Comenencia a conta cu e plaza ta special mirando e persona cu Jose tabata. Den presencia di amigo, yiu, primo y famia a cende luz y inaugura e plaza.
E tabata un homber sumamente ehemplar, Comenencia a comenta. Ainda cu su 100 aña e tabata activo ta traha obra di man y tabata regala e scolnan den Dakota p’asina e muchanan por aprecia su arte, ainda na e edad cu e tabatin. Semper a stim’e y lo sigui stim’e. Lo sigui recorda Jose Dania riba su fecha natal, esta 5 di october. Su yiu e priminti cu e lo t’ey tur 5 di october na Aruba p’asina hunto cu conoci, amigo y famia; recorda nan kerido Papa.
E tempo ey ora el a cumpli shen aña a organisa henter un fiesta pa Jose Dania. E tempo ey a cera henter caya compaña cu brassband, musica y ambiente. Dakota Boys ta consisti di grupo di amigo cu ta gusta hunga domino pero cu tambe cu gusta nan futbol, baseball y tambe softball. Lo sigui celebra e dia importante aki. For di unda cu e ta, ta sigur cu e por ta orguyoso di e muchanan di bario, cu e tempo ey a lanta ta hunga memey caminda y cu awe ta hunto na su plaza ta record’e. Papito ta gradici henter e pueblo di Dakota y Aruba general pa t’ey presente pero tambe tur cu a contribui. Tin un dicho ta bisa; un persona nunca ta muri, e ta muri ora bo stop di record’e y pensa riba dje.
