Algun dia pasa, Glenda Maduro a haci denuncia. E ta conta cu e persona cu e tin cera na Guarda nos Costa, a nenge su peticion di asilo politico. Si dado caso el a wordo nenga of el a wordo aproba, Maduro ta kere cu ta na su turno, di parti di e departamentonan concerni pa dun’e un copia, caminda cu e por haci un apelacion.
Maduro tin dos dia ta bin na Guarda nos Costa. Diaranson el a papia un biaha mas cu Trudy Hassel y a pidi’e si ta posibel cu por haya e copia, pa asina por haci un apelacion.
Trudy Hassel, na su turno ta nengando e copia di e persona aki. Maduro ta e persona cu a paga abogado p’e, e ta e persona cu ta moviendo y no tin derecho di haya un copia di su peticion di asilo politico nenga.
Awo su pregunta ta, unda y kico mester haci pa asina e personanan aki por sigui cana nan caminda. Manera cu por mira, Hassel a bis’e diahuebs, cu e doño di curpa tin cu pidi copia di e peticion. Doño di curpa, dilanti di Maduro, ora di bishita a pidi un di e funcionarionan pa duna Maduro e copia, a bisa pa bin mainta. Maduro a bin mainta y un biaha mas a haya Trudy Hassel y el a neng’e un biaha mas e copia di e peticion di asilo nenga.
Pakico, Maduro no sa. Esaki ta e tipo di cosnan cu por bisa cu e hala di e personanan aki ta wordo corta. Ta laga e señora aki haci y deshaci, kibra ley. Ta algo cu e persona tin derecho riba dje pa apela su caso. E ta wordo nenga un biaha mas, segun Maduro.
Maduro kier a haci un denuncia oficial. E tres personanan cu diahuebs a wordo reteni un biaha mas, pasobra nan asilo a wordo nenga, e tres personanan ey ta riba welga di hamber for di diahuebs.
Maduro ta responsabilisa gobierno di Aruba, pasobra awor aki gobierno tin cu cay den e cos aki, pa e bida di e tres personanan ey cu diahuebs a wordo reteni, sin derecho cu nan por haya nan copia pa nan apelacion, nan ta den welga di hamber for di diahuebs mainta ora cu nan a drenta na Guarda nos Costa.
Maduro a haci e denuncia oficial. Ta bay traha un carta pa hiba e denuncia aki tanto na Ministerio Publico y na Landsrecherche, pa cuminsa haci un investigacion riba e persona cu ta encarga cu e departamento aki di Guarda nos Costa.
E ta haciendo abuso di su poder como hefe di e departamento. Oficialmente, ta bay entrega e demanda aki, segun Maduro.
