Fundacion Nos Ta Aruba a manda un carta pa fiscal di Ministerio Publico, mr. W.V. Gerretschen, den cual ta amplia mas riba e acusacion contra ex-minister Otmar Oduber, di dia 25 di mei ultimo. A añadi un declaracion y peticion pa start un investigacion penal tambe contra Arulex Trust Services NV, pa su envolvimento y complicidad den financiamento y desaroyo di e proyecto di e hotel di 900 camber di Three Rivers Hotel na San Nicolas.
E peticion ta sigui bisa cu riba e fecha ya menciona, Fundacion Nos Ta Aruba a presenta nuebe acusacion penal contra e ex-minister. Oduber tabata minister di infrastructura y medio ambiente den Gabinete Wever-Croes te cu dia 12 di december 2019 y nombra como asesor special di e gobierno despues cu el a retira.
E punto central di tur e acusacionnan aki tabata e influencia y poder notabel di Oduber riba e gobierno y e Prome Minister. E ultimo aki a yuda y facilita Oduber personalmente den tur su negoshinan dudoso. E miho ehempel di esaki tabata e compra premira pa Oduber di un incinerator, na cual e Minister Presidente a duna honor y a pone presion pa pura pa pasa un ley special den parlamento, e famoso Ley di Serlimar.
Den un ocasion, el a hasta menasa parlamentario di RED, Ricardo Croes, si e no vota na fabor di e ley aki. Door di esey ex-parlamentario di MEP, Daphne Lejuez a retira di e partido como señal di protesta y a sigui como un parlamentario independiente.
E relacion entre e Minister Presidente y Otmar Oduber a sorprende henter Aruba e momento ey, precisamente pa su enemistad enorme prome cu eleccion 2017.
Fundacion Nos Ta Aruba, den e carta, ta haci peticion pa investiga profundamente e asuntonan di Arulex Trust Services NV y su participacion den e proyecto di hotel Three Rivers. Te asina leu Arulex Trust NV parce ta envolvi den caso Avestruz contra ex-minister Benny Sevinger y e proyecto hotelero di 900 camber di Three Rivers di ex-minister Otmar Oduber, actualmente investiga penalmente.
Arulex Trust Services NV, abogado H.S. Croes y e bufete di abogado Wever Croes Ruiz, ta envolvi tanto den caso Avestruz contra Sevinger como den caso Flamingo contra Oduber y tur cos ta indica cu nan ta forma parti integral di e organisacionnan criminal cu Ministerio Publico ta investigando.
Den transcurso di otro siman, Fundacion Nos Ta Aruba lo presenta un otro denuncia contra Arulex Trust Services NV, H.S. Croes y bufete di abogado Croes Wever Ruiz relaciona cu prestamonan gigantesco concedi na Utilities Aruba NV, Elmar NV y WEB Aruba NV a traves di Finance Quest, situa den Arulex Building di Hendrik S. Croes, De Ruijter a indica den e carta na Ministerio Publico.
