Den un rueda di prensa treci na canto di awa, minister di turismo, Dangui Oduber, a duna un splicacion pa loke ta e famoso toren cu tin ubica pa decadanan largo dilanti di e hotelnan grandi, en particular, Riu Antillas.
Esaki ta un toren cu generacion tras di generacion tabata haci uzo di dje pa recreacion den lama y den varios ocasion el a ordo restaura. E biaha aki, un biaha mas esaki tabata e caso.
E pier aki pa hopi aña tabata den un estadio deteriora. Na momento cu nan a drenta den gobierno, a pone como vision cu kier atrae turistanan di calidad. Y pa por haci esaki, bo producto como pais tambe mester ta un producto di calidad pa turistanan por haya balor pa nan placa. Awendia turista, ora cu e biaha, bay un pais, e ta busca balor pa su placa. Aruba ta conoci pa ta un destino di calidad. Turistanan ta placa hopi placa pa nan ticket, pa nan camber pa anochi y henter e infrastructura y producto, mester por cuadra tambe cu e prijs cu e turist ta paga. Den cuadro di esaki, a tuma nota di hopi tempo caba, di tempo cu nan tabta den oposicion, cu e pier aki, ta riba un di e miho beachnan na Aruba.
Un bunita paisahe, tabata den un estado di deterioro. Localnan no por a haci uzo di e pier aki. Turistanan no por a haci uzo di e pier aki. E tabata un mahos bista pa turista. E ora a tuma e iniciativa pa busca un partner den sector priva. Esaki ta un PPP pero un otro tipo, compara cu e gobierno anterior. Den e PPP aki, ta sector priva a cubri e inversion aki. Gobierno a acerca den e caso aki gerente general di Riu, y a splik’e kico ta vision y maneho di gobierno cu lo bay sigui inverti den embeyecimento den e area hotelero. Den e zonanan mas bishita di turistanan. A splik’e e intencion cu tin cu e pier aki, pa drech’e completamente, pa asina localnan por haci uzo di dje. Pasobra no solamente turistanan ta haci uzo di dje, sino hopi local tin memoria di e pier aki, di tempo cu nan tabata chikito.
E peticion a sali for di comunidad di Aruba, pa drecha e pier aki y na momento cu a acerca gerente general di Riu a splik’e kico ta e intencion y a pidi’e su cooperacion pa Riu cubri tur e gastonan di e pier aki, pasobra awe por tende oposicion ta grita, oposicion ta keha cu no ta gobierno a paga pa e pier. Ningun momento tabata e intencion tampoco. E gobierno aki ta bay busca e cooperacion di sector priva, pa sector priva tambe duna di nan banda, mirando cu nan tambe ta haci negoshi na Aruba.
Nan tambe ta gana hopi placa na Aruba, pa nan tambe yuda gobierno inverti den producto Aruba. Sigur e gerente general di Riu, sr. Juan Blanco, a mustra tur disponibilidad. El a wordo acerca inicialmente y ora a splik’e kico ta e intencion, kico ta e vision di gobierno, el a duna tur cooperacion y mesora el a cuminsa e proceso pa restaura e pier aki y awo por mira un pier cu ta bira un landmark.
Minister ta contento y gradicido na Riu, na sr. Blanco pa a brinda tur cooperacion necesario pa asina logra devela oficialmente e pier aki, cu ta cuadra den vision di gobierno y asina acerca cada hotel cu ta opera na Aruba, pa nan tambe duna un tiki di nan parti pa yuda upgrade producto Aruba, pa e ta riba e nivel cu kier den e caso aki, como minister di turismo, atrae e turistanan cu ta buscando.
