Awe merdia caba a start un accion grandi na altura di Boca Grandi, Boca Druif y Grape Field, net patras di KIA na Santo di Patia, ora cu un cantidad di bulto di droga a spula yega e costa eytras. Polis a yega durante patruya y a tuma nota di hendenan sacando e bultonan for di lama. Nan a bisa polis cu no ta di nan, cu pa casualidad nan tabat’ey y a nota bultonan ta drief riba lama y a bay saca nan. Polis no a confia e storia y a detene tur!
Varios unidad di polis a presenta mesora na e sitio pa detene e grupo aki, cu a pensa sigur cu ta loteria nan a gana, cu tanto droga ta spula yega cerca nan asina, anto di sorpresa. E cantidad di e bultonan, e peso di cada bulto y e contenido di cada bulto no ta conoci pa nos ainda. Si nos sa cu a transporta e lote di droga pa e departamento di crimen organisa di Cuerpo Policial pa ey start un investigacion di ken e droga aki ta y pa ken e ta destina riba nos isla.
E recherchenan awor lo mester saca afo si esaki ta un tendencia nobo di traha, un posibel cambio den e forma tradicional di importa droga riba nos isla. Cu e baronnan di droga ta opta pa risca hinca e droga den pleno luz di dia, enbes di purba trece anochi unda tin mas wowo di autoridadnan riba lama y na costa. Nan ta pensa cu den dia, como cu tin hende disfrutando di lama, cu e chens pa gara nan lo ta menos. Awel, awe esun cu a bin cu e idea aki a perde henter su cargacion, mientras cu esunnan cu “pa casualidad” tabata na lama e ora ey awor ta deteni pa interogacion.
Polis a opta pa atende e asunto aki cu e seriedad necesario y a separa e sospechosonan mesora. Pues a transporta 3 di nan pa oficina di recherche na Wayaca mientras cu a hiba e dos otro sospechosonan pa ward’i polis na Santa Cruz pa eynan interoga nan separa di e tres otronan. Aki e recherchenan experencia den atende tipo di casonan asina lo mester purba saca afo e berdad di e grupo di cinco sospechoso aki.
Asina por mira si e declaracionnan ta cuadra of si nan ta contradeci otro. Tambe lo mester verifica cu formulanan di inteligencia si ta pa casualidad e sospechosonan tabata den e area ey, of si ta e droga nan a bin busca. Polis probablemente lo check nan combersacionnan di celular, yamadanan haci, whatsapp of otro formulanan di contacto cu nan por tabatin cu otronan den preparacion pa busca e bultonan, mescos ta e plan di unda pa hiba nan despues pa por distribui nan riba nos isla.
Ta un hecho cu, dor cu fronteranan tabata cera pa varios pais den nos region, cu e industria di droga y productonan ilegal ta pasando den un tempo di berdadero crisis. E pandemia a afecta henter mundo, pues no solamente comercio legal sino tambe esun ilegal, cu ta depende di transporte comercial regular, sea avion of barco di carga, pa por move droga di un pais pa otro. Dor di e circunstancianan actual, ta obliga di purba tur e forma nan “iregular” y straño aki pa move e mercancia ilegal entre Venezuela y Colombia pa Aruba, cu e meta pa via di nos isla manda pa Canada, Merca y Europa, awor cu nos si tin nos fronteranan habri.
No solamente mandando droga como carga den barica di avion, pasobra nos a nota tambe cu e cantidad di casonan di gulido di bolita y bodypack tambe a aumenta e ultimo simannan aki. Ta comosifuera cu e mercado a perde 8 luna di benta, cu awo ta purbando di tur forma pa “haal in” e negoshi perdi den e temponan aki di fin di aña. Autoridadnan ta atento na waf y aeropuerto pa e tipo di carganan asina, mescos tambe ta extra vigilancia na costanan dor di Marina Real cu ta reenforsa wardacosta den e afan pa frena entrada ilegal di hende, droga, bestia y mercancia ilegal na Aruba.
