E homber Eugene Maduro ta detene desde diabierna ultimo. E ta respondiendo na interogacionnan policial rond di acusacion serio contra dje relaciona cu actonan di pedofiel. El a mishi cu un nieta di 9 aña y un nieto di 5 aña di su pareha, cu ta wela di e dos criaturanan aki.
Dia 7 di juni ultimo, mayornan di e dos muchanan envolvi, a presenta na oficina di “Jeugd en Zeden Politie” pa entrega un keho oficial contra e homber Eugene Maduro. E keho ta relaciona cu testimonio di ambos mucha, cu ta sigura cu e pareha di nan wela a mishi cu nan. Den caso di e mucha muhe di 9 aña, a hinca man den su panthy y mishi cu su parti delicado. El a ofrece e mucha placa pa e saca su potret sunu den baño. No tabatin penetracion den e casonan aki. Den caso di e mucha homber di 5 aña, ta acusa e mesun persona di a mishi cu su partinan delicado.
E caso riba su mes ta masha lamentabel, comokiera cu e muchanan a mira un figura ehemplar den dje. Como pareha di nan wela, el a abusa di e confiansa pa mishi cu e muchanan. Comportacion asina ta contra ley y ta castigabel pa ley.
Mientrastanto e muchanan ta na man di un psicologo infantil pa purba yuda nan. Trauma, puntonan na scol cu a bay atras y un comportacion distante na otro muchanan, ta e panorama di nan comportacion di awendia.
