Den cuadro pa desaroyo, conocimento y mehoracion di servicio na comunidad, a tuma luga un curso pa dos compania di roadservice. For di 14 di augustus 2023 te cu 18 di september 2023, a presenta e curso di “Afhandeling Verkeersongevallen”, destina pa road service na Scol di Polis E.J. Watty Vos.
E curso aki tabata dedica na e empleadonan di road service con a nan mester documenta un accidente. Pa asina tambe por brinda e comunidad un miho servicio abase di ley y reglanan di trafico.
E curso completo a wordo prepara y instrui pa specialistanan di Departamento di Trafico. E curso tabata encera un seccion teoretico y un seccion practico, den cual tur participantenan a pasa un prueba na final cu exito. Cu esaki participantenan a haya un miho bista y instruccion con pa atende cu un accidente di trafico, manteniendo nan mes na locual cu nan a siña den e curso.
Despues di mas cu un luna di un curso intensivo, tur participante a ricibi nan certificado concerni. Por bisa cu e road servicenan awor ta certifica pa tuma accidente di trafico pero tambe ta miho prepara con pa atende diferente scenario den trafico. Cuerpo Policial Aruba ta manda un pabien na tur participante di companianan di road service.
