Nos por a nota cu e asina yama “passenger facility charge” a wordo subi cu 15 dollar pa biahenan pa Merca y 13 dollar pa biahenan pa otro paisnan.
Esaki ta un abuso di marca mayor. Aeropuerto cu argumento fofo ta bisa cu nan ta cobra e aeroliña y no e pasahero pero nos tur sa cu e aeroliña ta pasa e gasto aki pa e pasahero. Aeropuerto ta kere cu hende ta bobo di kere loke nan ta bisa. Nos sa cu na aeropuerto e salarionan ta barbaro cu hendenan cu ta gana como 40 mil pa luna un abuso completo anto awor ta hisa e passenger facility charge cu 15 y 13 dollar. Mi a bai ariba internet pa mira si e aeroliñanan ta cobra e hisamento aki den e pasashi y mi a nota pa loke ta trata Merca prome cu 1 di juli aeroliñanan tawata cobra 54.11 dollar pa cada pasahero na gastonan di salida. Cu e medida nobo aki bo por mira cu e gastonan di salida a subi na 69.11 dollar den e pasashi. Cu otro palabra e aeroliñanan a pasa e medida pa e pasahero. Si nos conta e 10 dollar cu ja caba e turista ta paga pa ATA e total na gastonan di salida pa Merca ta yega 79.11 dollar pa Aruba pa cada turista.
Esaki ta hasi cu aeropuerto di Aruba ta number 1 den caribe di gastonan di salida y number 2 den mundo tras di Inglatera na unda e belasting ta 95 dollar. Esaki por hasi daño na turismo di Aruba y esaki a wordo demonstra den varios estudionan na otro paisan cu a subi nan belasting di salida anto cu sumanan mucho menos cu na Aruba. Na Merca e aeropuertonan solamente ta cobra 5.60 dollar. Partido CURPA durante ultimo eleccion tawata e unico partido cu a pone den su programa cu lo baha e airport tax. Nos lo a elimina airport tax pa tur cuidadano di Aruba cu nacionalidad Hulandes ariba 60 aña y esnan vulnerabel y nos lo a baha e airport tax den reino hulandes pa 20 dollar pa tur cuidadanonan di Aruba cu nacionalidad Hulandes. Esey tawata den nos programa y si pueblo a vota pa partido CURPA pa ta den gobierno, hamas e aumento aki lo a tuma lugar pero lamentablemente esaki no ta e caso. Awor e pueblo mester wanta e abuso aki y tur otro abusonan di medida di e gobierno aki cu no mester ta asina. E gobierno aki a primiti cu nan no lo bin cu medida pero no a cumpli, algo cu partido CURPA hamas lo a tribi di hasi.
Nos semper ta sali for di punto di bista cu nos Si ta un SI y nos NO ta un NO. Goberna un pais of maneha un compania cu medida cualkier mucha por hasi y ta e easy way out. Gobierno ta shareholder di aeropuerto y fasilmente por a preveni e subimento di e passenger facility charge aki pero no a hasi esaki pasobra ta parce nan kier haya mas dividendo di aeropuerto via un triki indirecto y airopuerto no kier perde placa di nan ganashi door di duna mas dividendo na gobierno pa asina nan por sigue paga e salarionan barbaro na aeropuerto. Si un compania kier expande nan negoshi e prome cos cu nan lo hasi ta bai banco y fia placa, of saca mas shares y paga esaki back cu nan ganashi. Aeropuerto fasilmente por a usa nan cashflow pa cualkier proyecto especialmente si nan no tin debe. E manera baho cu aeropuerto cu sostene e gobierno pa subi esaki door di hisa e passenger facility charge ta uno di abuso.
Si partido CURPA haya e oportunidad den e siguente eleccion pa goberna, nos lo draai back e abuso aki hunto cu e otro abusonan inhusto di gobierno y companianan estatal. Dia 1 di Juli proximo lo ta un dia scur pa Aruba y su economia y esaki ta danki na e gobierno aki cu falta vision, creatividad y boluntad di bin cu solucionnan cu no ta rekeri medida pasobra na final di dia esnan cu bin cu medida ta esnan cupabel pasobra semper tin e opcion di no bin cu medida pero a scohe e easy way out. Esey ta un dikke onvoldoende y brevet van onvermogen pa goberna.