Dos siman pasa Corte di Casacion na Hulanda a tuma un decision den e caso di fraude cu a tuma luga na Departamento di Enseñansa cu fondo di fiansa pa estudio. Aki dos empleada, Linda J. Tromp y Virmary Quandt a haci nan mes culpabel na fraude di fondo publico. Nan a haya ayudo di otro personanan tambe, di cual a persigui e otronan pa labamento di placa. Pero e dosnan aki a opta pa bringa nan inocencia den Corte Comun di Caribe Hulandes y despues di esey, como cu nan no a keda satisfecho, a opta pa bay te Corte di Casacion na Hulannda. A acusa nan di fraude di mas cu 1.6 miyon florin!
E duo tabata opera tanto na Aruba, Corsou y na Hulanda cu e cen cu nan a horta via fraude pero despues cu nan a caba di sinta nan castigo di prizon pa e acto criminal aki, Gobierno a demanda nan pa paga e cen bek via un proceso civil. Pa determina ta cuanto placa e duo a obtene ilegalmente tabata henter un laberinto. Nan tabatin cuenta di banco na MCB Corsou, na Aruba y na Hulanda tambe. Banda di esaki un di nan tabata cobra Bijstand, cen pa yiu y seguro social na Hulanda tambe. Esey ta sin conta e entrada cu nan tabata haya di un set di apartamento cu nan tabata huur.
Na aña 2016 Corte Comun di Caribe Hulandes (3 Hues) a dicta cu nan cada un mester paga Gobierno e suma di Afl. 753.933,63 bek dje placa cu nan a ‘lanta’ ilegalmente. Si nan no paga, nan tin cu bay cera pa 18 luna. Y ni maske nan paga parti di e placa so, tambe nan ta bay 18 luna cera.
E duo no a acepta e veredicto y a hiba e caso Corte di Casacion na Hulanda caminda e tribunal a cuminsa pa duna nan descuento di 10% riba e suma cu nan mester paga pasobra e caso a keda drumi demasiado tempo.
Abogado di e acusadonan a argumenta cu nan no tin moda pa paga e suma pero Huesnan no kier a tende: Paga Afl. 753.933,63 of bay 1 aña ‘pa’riba’. Corte di Casacion na Hulanda tabatin dolor di cabes pa saca nan som ta cuanto placa e duo a mafia pasobra e proces-verbaal di Polis tabata yen di buraco. Loke nan a haci ta conta tur cen cu e duo a haya legalmente y a investiga cuanto placa nan a gasta. Un sistema relativamente primitivo.
Den nan investigacion, Polisnan a bay bek te aña 2001 cuminsando cu un saldo di 25.000 florin cash y casi 15.000 florin riba nan cuenta di banco. Den esaki e duo tabatin un suma di 237.449,47 florin di entrada legal y Bijstand di 15.899,25 florin for di Hulanda y Kinderbijslag di 9.544,89 florin. Nan cuentanan di banco tabata gordo-gordo cu saldonan na ABN AMRO, Postbank, MCB Kòrsou y Aruba, y asina a yega na un saldo di 320.269,92 florin cash tambe na aña 2007. Na Hulanda nan a haci transaccion pa 803.010,99 florin y contando transferencia cu nan a haci riba nan mesun nomber, na final nan a alcansa e bunita suma di 1.675.408,07 florin. Esey ta nifica cu e duo a parti e placa y cada un mester paga 837.704,03 florin, descontando 83.770,40 florin, lo yega na 753.933,63 florin Arubano.
Abogado General tabatin critica pisa riba e sentencia cu Corte Comun di Caribe Hulandes a dicta pasobra e ta yena di erornan. Cu otro palabra, no a keda Abogado General otro sino pa anula e veredicto den Corte di Husticia Comun di Caribe Hulandes y duna e duo aki un sentencia nobo di Corte di Casacion di Den Haag, Hulanda.
