Recientemente partido AVP a pidi un permiso di MFA Noord pa organisa un reunion eyden. E evento ta programa pa diamars awor. Despues cu a firma e acuerdo di huur y a cobra e partido politico, a opta pa na caminda cambia di opinion y nenga pa e evento tuma luga eyden. Awe, durante un caso sumario den Corte, a sali un carta firma pa Prome Minister Evelyn Wever-Croes, den cual e ta bisa cu Gobierno ta haci un excepcion y ta duna e permiso toch.
Gobierno a skirbi den su carta cu nan ta prefera pa no organisa eventonan politico den edificio di Gobierno. Pero, pa evita caso den Corte, a opta pa haci un excepcion e biaha aki, bou di e condicionnan acorda den e acuerdo di huur. Cu e carta aki riba mesa, Hues no tabatin mester di atende e caso mas.
