Ecogas tin un periodo caba ta papiando cu Serlimar, pa asina por yega na un acuerdo con pa procesa tur sushi di Serlimar.
Segun Ramsey Halabi, managing director di Ecogas, nan tin basta tempo caba ta procesando e sushi di Ecotech, cual ta nan cliente di mas grandi, caminda cu ta procesa nan den nan planta di separacion, separa tur sushi den diferente fraccion, den cosnan cu por recycle ainda y cosnan cu no lo kier den e sushi. Asina ey empaketa y reduci e volumen cu gran parti, un 80 porciento ta empaketa den bulto y bao maneho di Serlimar, ta pone nan na Sero Tijshi.
Den e ultimo temponan ta papiando di Serlimar pa haci e mesun cos pa nan. Halabi a ofrece nan e servicio ey. Diabierna ultimo a keda cla cu nan. Ya caba dialuna a cuminsa ricibi e prome truck, sigui pa otro tres truck. Asina ta keda pasa door di e proceso, te ora cu nan chauffeurnan conoce e sistema. E prome dos simannan ta un parti di orientacion y despues ta cuminsa bay pa 100% tur sushi comercial y residencial. Asina impedi cu e seronan na Parkietenbos sigui crece. Esey ta lo mas importante.
Acuerdo di tempo limita
Tin un acuerdo pa un periodo y lo reevalua cada biaha con e periodo a bay, segun Halabi.
Prome paso
Esaki por consider’e como un prome paso y uno importante. E dificil di sushi ta, pa organisa bo mes di tal forma cu bo por maneha e desperdicio. E Environbaling, ta duna e oportunidad pa diferente opcion. Sea bo ta dera, sea bo ta mov’e. Tin hopi posibilidad cu ta presenta cu Environbaling.
Segun Halabi, Environbaling mester keda un forma integral con pa maneha sushi, pa motibo cu Aruba tin espacionan limita pa landfilling. Lo wak kico lo tin den futuro. Pero pa awor aki Environbaling ta un bon opcion.
Kico e ta nifica pa operacion
Pa operacion e ta nifica cu tin cu traha un tiki mas duro, tin cu busca mas hende. E compania lo crece un poco. Mester di mas makinaria pa duna un servicio garantisa den sentido cu mester por handle e sushi 100% di e tempo y percura cu no tin breakdowns, etc Por mira cu Ecogas lo crece den personal y makinaria.
Draai mas ora
Lo bay draai mas ora, segun Halabi. Awor aki ta haciendo tur e sushi di Ecotec den un shift di ora y keda cu suficiente tempo pa haci limpiesa, mantencion preventivo di ekiponan y esey lo ta e intencion tambe ora cu Serlimar join. Probablemente lo tin cu ampli’e den un di dos shift, pero semper y cuando mantene eficiencia y mantencion preventivo.
Truck
Awor aki ta papiando di 20 truck pa dia. Nan tin 10 truck coriendo dos ruta, cual ta forma 20 truck. Esey den calculacion ta rond di 100 ton pa dia. Ecogas ta double e productividad di e planta. Esey ta loke ta premirando, segun Halabi.
Maneho di sushi na Aruba
A bin ta mustra hopi tempo cu nan manera di traha ta un manera eficiente, organisa y responsabel. Tur e clientenan di Ecotech ta trankil caba cu e servicio den e sentido cu nan sa cu nan sushi ta wordo maneha responsablemente. Tin un aña caba ta operando na e manera aki.
Por bisa cu no ta haci uzo di e landfill. Nada no ta bayendo eynan, Halabi a remarca.
Consecuencia
No tin ningun consecuencia pa e trahadonan di Serlimar. Ecogas ta sec e parti di verwerking. Nan ta keda trece nan sushi manera cu e ta bayendo awor aki. Trucknan ta drenta. Logicamente pa nan ta hopi mas positivo den e sentido cu nan no tin nodo di cana riba sushi of tene miedo di candela, vapornan toxico cu tin den caso di un landfill. Nan ta haya un vloer limpi y nan tin tur derecho di keha si e vloer no ta limpi. Ta responsabilidad di Ecogas pa trata nan manera un cliente.
Separa den dos pida
Nan tin un dipping floor, ta caminda cu ta dump e sushi y eynan e grua ta carga e planta. Una bes cu e sushi drenta, tin un mashin cu ta un Primary Shredder, cual ta shred e sushi na sizenan chikito pa e planta por maneh’e. Una bes cu esey pasa, e material ta wordo desvia pa e planta di separacion, caminda cu e proceso mes ta cuminsa. Al final empaketa e sushi.
Satisfecho
Halabi a splica cu e ta contento cu e acuerdo. Ta un comienso di un cooperacion. Esaki ta algo cu hopi tempo caba den nan opinion, cu nan tabata kier. Semper Ecogas tabata kier tin cooperacion. Nan ta kere den esey. Cu tipo di acuerdonan aki ta bay beneficia Aruba por lo general, loke ta trata maneho di desperdicio. No tin ningun luga den Caribe cu tin un facilidad manera cu nos ta goza di dje. Ta spera cu na Aruba por ta orguyoso di un manera responsabel pa maneha desperdicio.
