Un accidente basta serio a sosode riba e caminda di Bubali. Tabata algo pasa di 12:00am cu chauffeur di un Peugeot color geel y biniendo for di pariba cu velocidad basta halto a accidenta. Pa un of otro motibo e auto a baha caminda despues cu e chauffeur a perde control. El a kita na man robez y bay dal den un post di coriente.
Daño material tabata grandi y e manehado a haya basta sla na cabez y curpa. Pa motibo di e impacto fuerte, e manehador tabata tras di stuur y a bay cay na e asiento di pasahero.
Ambulance y ekipo di rescate a presenta pa asina saca e manehador for di e auto y despues a transporte pa hospitaal. Na prome instante ora e yamada a drenta, tabata papia di un sonido fuerte di motor di auto y despues a tende un klap. Asina bisiñanan cu a yama a core sali mira y ta topa cu e situacion unda auto a dal hopi duro.
E polisnan di Noord a yega prome y despues mirando e situacion di e chauffeur a pidi tambe presencia di Polis di Trafico. Nan a haci investigacion riba e caso.
Un testigo a conta cu ora e auto a dal e tabata sinta ta come den cercania. A mira e velocidad halto cu e auto a pasa bay. Ora el a core yega cerca e chauffeur, el a haya holor sterki di alcohol. Investigacion lo saca afo kiko exactamente a sosode.