Clark Abraham ta compronde e preocupacion di Aruba y Corsou pa e problema di ilegalnan y refugiadonan di Venezuela, pero e no ta sigur cu Boneiro por carga e peso socioeconomico aki. “Nos no a papi’e cu Hulanda nunca. Esaki ta nobo pa nos”, asina Clark Abraham di Partido Demokrat a duna di conoce.
E miembro di Conseho Insular pa Partido Demokrat na Boneiro actualmente ta den oposicion pero ta siguiendo tur desaroyo di cerca. E ta considera cu Venezuela semper tabata un partner fuerte pa tur tres isla den Caribe Hulandes. “Mi ta imagina cu nos mester ta bon cu otro den tempo bon y malo. Pero un formula con pa yuda den e momentonan aki no ta mucho bon conoci ainda”, el a vocifera awe mainta.
Hecho ta cu Boneiro mes no ta atende e tipo di asuntonan asina, sino ta na nivel di Ministerio di Asuntonan Exterior di Hulanda. Es mas, nan mes como isla no ta miembro di IPKO pa por repasa tur e retonan den e region. Hulanda ta representa nan den e reunionnan ey unda na nivel di region Caribense ta atende cu e tipo di asuntonan asina.
“Nos mes ta kere den estrecha lasonan mas ainda cu nos rumannan Corsou y Aruba, pa por reuni riba precisamente e tipo di casonan asina. Si nos tin un plataforma di hermandad asina, por a sinta na mes pa mira unda Aruba ta yuda, cua parti Corsou ta atende y den ki forma Boneiro ta saca un man”.
Algun tempo atras, tempo di e problema di Siria cu refugiadonan na Hulanda, a atende e pregunta si Boneiro lo por ta un alternativa pa manda nan. E tempo ey a saca afo cu e suma cu ta duna nan “bijstand” of “onderstand” mensual no ta alcansa pa brinda e refugiadonan un bida digno. Ta na e momento ey a start e discusion con por ta posibel cu e suma no ta yega pa un refugiado pero e Boneriano cu oportunidadnan limita cobrando onderstand si mester lucha cu e ayudo miserabel aki!
E politico Boneriano no tin problema pa traha hunto ni tampoco pa mustra Venezolanonan compasion den nan situacion, pero siendo un isla chikito cu poco recurso y cu retonan socioeconomico den cas caba, ta un peso hopi pisa awor ta propone pa nan, sin cu a atende e asunto na nivel di Gobierno di Hulanda ni tampoco directamente cu nan mes. Abraham a sigura cu den Conseho Insular e punto aki nunca a bini padilanti.
Clark Abraham ta na cabes di Partido Demokrat cu su welo y otronan a funda na aña 1954. Actualmente nan ta for di coalicion, despues cu dos miembro di nan partido a cera un acuerdo “independiente” cu UPB pa traha hunto.
