Heart-Centered Leadership Foundation tabata tin un aña 2017 sumamente productivo – un aña cu training, programa, workshop, seminario y guia individual y den grupo ofreci na mas cu 450 hoben.
Heart-Centered Leadership Foundation tin como meta pa inspira, motiva y guia hobennan den nan desaroyo personal por medio di training, seminario y programanan interactivo cu ta promove liderazgo y desaroyo. E principio di Heart-Centered Leadership Foundation su meta ta cu si traha ‘di paden bin afo’, nos tur por realisa nos potencial y por enfrenta cualkier obstaculo of reto den nos caminda pero para firme den nos sapato.
Durante 2017, Heart-Centered Leadership Foundation tabata tin 3 enfoke principal: continuacion di su proyecto ‘Nan Futuro, Nos Deber’ cual ta pa traha riba prevencion di ‘school drop-outs’, ofrece trainings y seminarionan cu ta promove desaroyo personal di nos hobennan, y lansa oficialmente su plataforma di hoben ‘Aruba Youth Impact’.
E proyecto ‘Nan Futuro, Nos Deber’ tin como meta pa traha riba prevencion di ‘school drop-outs’ door di ofrece guia individual na hobennan cu tin riesgo di kita di scol. Durante 2017, Heart-Centered Leadership tabata ehecuta e proyecto na dos scol secundario, uno na Oranjestad y uno na San Nicolas, ofreciendo sosten y guia individual y den grupo na 43 alumno. E proyecto ta un iniciativa di ‘Kansen Voor Jongeren Cariben’ y ta cay bou di capa di Samenwerkende Fondsen.
Ademas di e proyecto ‘Nan Futuro, Nos Deber’, Heart-Centered Leadership Foundation a duna diferente training y workshops. Un di e trainingnan ta ‘The Power Within Me’, cu ta enfoka riba diferente aspecto manera autoestima, communicacion, teamwork, y traha riba meta pa yuda un hoben bay dilanti. En total, directora di Heart-Centered Leadership Foundation, Sra. Siouxsie Kock a facilita 14 training y workshop durante 2017 na entre otro: cuatro 3e klas y tres 1e klas di Maria College Mavo, durante Summer Courses di Parlamento Hubenil, durante Expo Labor, na un 3e klas y dos 1e klas di Filomena College Mavo. Un session special di ‘The Power Within Me’ tabata den luna di Maart, unda a haya bishita y participacion di 6 studiante y 2 profesor di University of South Carolina su College of Social Work cu tabata di bishita na Aruba pa conoce mas di Aruba su instancianan social.
Dos programa grandi cu Heart-Centered Leadership Foundation a organisa e aña aki ta dos seminario pa hoben. E prome a tuma luga den augustus, ‘Youth Leadership Program’, un seminario di 4 dia. E seminario ta uno di Insight Seminars, y a wordo facilita door di Alicia Stephany. Durante e seminario, 28 participante a traha riba diferente aspectonan di confiansa propio, communicacion effectivo,fortalese relacionnan cu famia y amigonan cu ta saludabel, con pa anda cu ‘peer pressure’, y con pa traha riba nan mesun desaroyo den un manera positivo y saludabel.
E seminario aki a wordo sigui pa un ACE Program di 3 dia pa alumnonan di derde klas di Filomena College Mavo y 1 dia pa maestronan di e school di 5 pa 8 september 2017. Cu sosten di ex-Minister di Educacion y Famia, Sra. Michelle Hooyboer-Winklaar, a trece ACE Program bek Aruba. ACE Program ta un programa cu ta enfoka riba desaroyo di karakter, maneho personal, inteligencia emocional y desaroyo di habilidad interpersonal.
Heart-Centered Leadership Foundation a culmina 2017 hopi satisfecho cu e trabou haci y ta mira pa dilanti pa sigui apoya y motiva hobennan den nan desaroyo personal.
E mision di Heart-Centered Leadership Foundation ta pa fomenta hobennan pa mañan ta lidernan consciente, cu integridad sincero y guia pa principionan cu ta bin di nan curason. Heart-Centered Leadership ta sigui 2018 cu nan proyecto ‘Nan Futuro, Nos Deber’, cual ta culmina na juni 2018, y ta enfoka riba progreso di su proyecto nobo ‘Aruba Youth Impact’, un plataforma di hoben cu meta pa hobennan bira miembronan activo den nan comunidad door di tuma accion: ‘brain storm’, comparti idea, identifica retonan den comunidad y traha activamente pa trece cambionan cu nan kier mira den nan comunidad.
Heart-Centered Leadership Foundation kier a gradici tur cu a sostene nan durante 2017 esta, CEDE Aruba, Kiwanis Aruba, Cavelier Logistics, Quota Club Aruba, Compra, WEB Aruba NV, Frasa, ALBO Aruba NV, boluntarionan cu a asisti durante e trainingnan y seminarionan y demas personanan cu a haci donacion pa por a organisa e seminario y programanan. Hunto nos por sigui inverti den e futuro sostenibel di nos hubentud y crea lidernan consciente, responsabel y cu un curason pa nan comunidad!
