Un situacion penoso a tuma luga na apartamento di placer conoci na Meiveld. Polis a presenta y detene un homber cu tabata actor principal den e storia aki.
Diaranson merdia, den careda di 12:00pm, ta pidi presencia di polis na e conocido apartamento di placer Nos Luga situa na Meiveld 27B caminda algo lo a bay completamente robes di e intencion inicial.
Locual a compronde na sitio ta cu a surgi un problema entre e homber y e dama cu tabata den apartamento cu ne na e momento ey, y cu na final a detene e homber na sitio. Segun informacion lo ta trata di un caso di maltrato, pero no por confirma esaki.
Transporte di polis a yega despues di un rato y hiba e homber direccion warda pa asina e duna cuenta di su acto. No ta conoci si e victima tabata tin mester di tratamento medico pero na sitio no a pidi pa ambulance.
Ta mustra cu enbes di cos a caba dushi pa e pareha, e aventura aki a caba hopi na malo pa e dama envolvi.