Esaki ta loke minister di Salud Publico Dangui Oduber a bisa den un conferencia di prensa di Gobierno dialuna mainta.
Oduber a splica cu tin tres vacuna cu tin un efectividad di mas cu 90%. Hulanda ya caba a haci su pedido, y nan a haci un compromiso cu Aruba cu un parti di esaki lo yega Aruba tambe. Loke Hulanda cumpra ta bay pa e pais mes pero tambe pa e islanan Hulandes den Caribe. Con ta reparti e volumen bou di e islanan Caribense no ta conoci. Hulanda a haci su ordo di compra caba y e mandatario ta kere cu prome cu fin di aña e parti cu ta toca Aruba lo ta aki caba.
Si e mandatario a splica cu e prome nan pa bini na remarca ta personanan trahando den cuido, manera ta e regla mundial, despues ta e personanan di edad mas halto y esnan den e grupo di riesgo. “Automaticamente e vacuna no ta bira disponibel pa tur hende di inmediato pasobra lo no tin e cantidad necesario ey e aña’ki ni den e prome kwartaal di 2021.”
Sharin Koolman di DVG tambe tabata presente den e conferencia y a splica cu ta preparando pa ricibi e vacuna. El a splica cu e promenan cu mester ta bon pa atende e pashentnan ta esnan den cuido. E siguiente grupo, despues di a hiba varios deliberacion, ta e grupo di 60 aña pariba. Inicialmente a pensa riba esnan di 70 aña bay ariba, pero despues a adapt’e. Tambe ta bini na remarca esnan di malesa cronico, o sea e grupo vulnerabel. Aunke e no ta obligatorio, ta conseha tur hende pa tum’e.
Ta crea un sistema digital pa pidi cita pa haya e vacuna, pa evita aglomeracion. E sistema digital ta uno hopi mas eficiente.
Te ainda no ta conoci cual ta e tipo di vacuna cu Aruba ta bay ricibi y tampoco sa si e ta un of dos dosis.
