Ambiente di Pasco a yega den Sta Cruz. Diadomingo anochi tabatin e ceremonia na Hof’i Marawiel unda cu e cantante hoben Sophi-Anne Kelly a corta cinta pa inaugura oficialmente e parke di atraccion den e bario di Santa Cruz.
Lourdes Boekhoudt un habitante pa 61 aña di e bario di Marawiel tabata hopi contento no solamente mira su inauguracion pero a recorda e temporada cu nan a pasa ta preparando pa decora e Hof’i banda di nan cas. For di momento cu e pandemia a yega, famia no tabatin mucho cos di haci y asina poco poco a uni pa decora e Hof’i cu poco poco a bira mas grandi.
Despues su yiu homber a acerca Rubin Ponson y a pidi’e skirbi un cancion cu ta cuadra cu e proyecto aki. El a debuta cu e cancion aki durante e apertura, unda tabata presente famia y bisiñanan.
Sophi-Anne Kelly ta wordo compaña pa e banda Melodia den e cancion aki.
Famia ta hopi agradecido na tur esnan cu a yuda cu decoracion na momento cu nan a tende di e proyectonan cu nan tabata trahando riba dje. E luga ta habri pero teniendo cuenta cu reglanan di DVG, bisti tapaboca y mantene distancia.
