Obispo Luis Secco di Obispado di Willemstad a manda un carta pa Prome Minister Mark Rutte den cual e ta haci un apelacion dramatico na e politico Hulandes. E ta bisa Prome Minister Rutte entre otro cu esaki no ta momento pa construi muraya den Reino sino brug y cu solidaridad na e momentonan aki no ta un luho sino un urgencia hopi grandi.
Cu palabranan di hopi solidarismo e maximo representante di iglesia catolico na e paisnan Hulandes den Caribe ta papia di e situacion reinando principalmente na e islanan Aruba, Corsou y Sint Maarten. Obispo Secco ta admiti of comparti e preocupacion di Den Haag riba e maneho financiero di ultimo añanan pero na mesun momento ta bisa cu mester admiti tambe cu e islanan a bin ta haciendo cambionan. E ta enfatisa cu e carta aki e ta skirbi los di cualkier ambiente politico, pero for di e responsabilidad cu nan ta sinti como iglesia pa e bienestar di e poblacionnan di e seis islanan cu ta cay bou di nan hurisdiccion.
Obispado ta expresa di ta hopi preocupa mes pa recuperacion y consolidacion di un gobernacion efectivo, eficiente y adecuado, sin corupcion, unda ta faborece directamente of indirectamente famia y amigonan. Esaki ta algo cu nan ta reconoce y comparti cu Hulanda. Pero nan preocupacion a bira mas grandi cu e consecuencianan di e pandemia. E Gobierno a haya nan mes ta busca ayudo financiero pa por cumpli, trece trankilidad y confiansa cu e islanan lo recupera.
A haci un apelacion grandi pa scucha e mensahe di Papa Francisco durante Pasco Grandi “cu e pandemia no ta tempo pa indiferencia, tampoco pa egocentrismo, pero e necesidadnan mester uni hende den confrontacion di e pandemia y su consecuencianan serio.” Y el a agrega na esaki cu “esaki no ta momento pa division. No ta luga ni momento pa construccion di murayanan pero di brugnan den Reino.”
E ta papia pa no laga e sentido di solidaridad bay perdi, ya cu e por conduci na consecuencianan social economico negativo grandi pa e ciudadano comun y coriente.” A mustra cu Gobiernonan di e islanan ABC a traha duro riba un plan di recuperacion pa hunto cu Hulanda garantisa Bon Gobernacion y stimula desaroyonan nobo.
“Pa nos como Obispado, no ta cifra y solamente plannan ta guia, pero cu na e momentonan aki e ta bay pa nos ciudadanonan simple cu ta sufri y ta herida den nan integridad di ser humano….”
“Ta conoci cu bo persona semper ta dispuesto pa cu bo creatividad busca solucionnan pa situacionnan serio unda e consecuencianan ta grave pa hopi hende…, P’esey nos peticion na bo persona, pa bot rata di busca un caminda adicional pa hunto yega na un solucion pa e situacion social economico alarmante, unda cu e ciudadanonan di e paisnan ta sufri cu e consecuencianan negativo di esaki.”
Asina Secco ta sugeri pa personanan serio di e islanan hunto cu expertonan di Hulanda, crea un mecanismo di control pa cumplimento di e condicionnan y vigilancia di esaki. No solamente e control financiero, pero tambe pa tumamento di mediconan cu mester conduci na restauracion consolidacion di un Bon Gobernacion y miho desaroyonan social economico pa e pueblo.
Na final e ta bisa “Prome Minister, solidaridad na e momentonan aki no ta un luho, sino un urgencia grandi y nos ta pidi Bo cooperacion”. Copia di e carta aki a bay tur instancianan concerni manera e Minister Presidentenan di e paisnan den Reino, Parlamento, Gobierno, Eerste y Tweede Kamer di Hulanda.