Minister Presidente a test negativo pa Covid-19

Ayeratardi lat Minister Presidente mr. Evelyn Wever-Croes a yega Aruba for di su biahe di trabou na Hulanda. Di acuerdo cu protocol estableci, pasaheronan cu bin di Hulanda mester test sea aki of na Hulanda pa por drenta nos isla. E prome mandatario a test aki y a pidi’e pa keda 1 dia den cuarentena, sperando resultado di e test haci cu na na Aeropuerto. 

Awe mainta e prome mandatario di nos pais a comparti resultado di e test riba su pagina di Facebook, den cual DVG ta inform’e cu su test a sali negativo. Cu esey e mandatario no mester keda den cuarentena mas. 

Kisas ta bon pa aclaria, cu na momento cu a habri fronteranan dia 1 di juli ultimo, e exigencia pa keda 14 dia den cuarentena no ta existi mas. Awor aki, como cu ta test tur esunnan cu bin di paisnan di riesgo, ta necesario djis pa warda riba resultado di e test y despues ta cla. Ta solamente den caso cu e test sali positivo, lo mester bay den isolacion, tanten cu no tin sintoma. 

E testnan cu ta haci na Aeropuerto sinembargo ta bay bastante rapido y den algun ora di tempo e ta produci un resultado. Den e caso di nos Minister Presidente, awe trempan e tabata sa caba cu el a test negativo y como tal e ta cla pa por sigui eherce su funcion como lider di nos pais.