Na e momentonan aki hotelnan ta plat, di cual practicamente no tin huesped. Desde awo Aeropuerto ta habri pa cuminsa ricibi mas o menos 10% di turistanan cu normal Aruba ta ricibi den e mesun temporada aki. Empleadonan di Riu Palace Aruba ta cobrando 60% di subsidio di salario for di ayudo di Gobierno di Hulanda, pero nan kier cobra 20% extra pa yega 80% di salario. Pa esaki sindicato Federacion di Trahadornan di Aruba (F.T.A.) a reuni cu e empleadonan pafo di e hotel, durante un accion.
Den e ultimo luna e sindicato a reuni 3 biaha cu gerencia di e hotel. A manda un protocol similar di tur otro hotel, pidiendo e compania pa añadi e 20% extra riba e 60%. Riu Palace Aruba ta e prome compania cu a firma algo, optando pa duna e empleadonan un suma di placa di 600 florin pa kinsena, prome cu e subisio. Segun Tyrone Bremo di sindicato F.T.A., asina cu e subsidio a bini, nan a acerca companianan riba esaki. Companianan cu ta afilia na F.T.A. a yega na acuerdo, a firma e protocol di 20% y algun extra condicion.
Aworaki nan no ta yegando na un acuerdo cu Riu Palace Aruba. E compania ta para riba di no kier papia over e protocol, pero ta keda para riba su punto di situacion financiero di no tin placa y no lo haci esey. Tur compania ta pasando den un situacion precario, pero e empleadonan tambe. E compania a bay di acuerdo pa un suma di placa te fin di aña. A haya subsidio y por duna e 20%, pero a opta pa no haci esaki. F.T.A. ta considera cu Riu Palace Aruba no tin e respet pa sinta na mesa pa purba yega na algo.
F.T.A. a manda un protocol di 10 punto y a yega na un acuerdo cu otro companianan, di cual cu Riu Palace Aruba nan no ta logrando. E empleadonan no ta acepta y a dicidi di bay den accion. Aunke cu e hotel no tin hopi trabou na e momentonan aki, e empleadonan tin derecho pa expresa nan malcontento. E compania ta para riba cu nan tin opcion di duna 20% y a opta pa no haci esaki. E empleadonan cu ta na cas ta cobrando 60% di loonsubsidie, mientras esnan cu si traha ta cobra e cantidad di ora. Bremo a bisa cu si un empleado ta poni riba schedule pa traha 100% pa ora, nan ta cobra e 100% di salario. Den reunionnan anterior, gerencia di hotel a bisa cu lo yega cierto cantidad di huesped, pero esaki no ta hopi y ta proyecta cu lo keda subi pocopoco.
Ley ta duna nan un opcion pa duna algo extra. F.T.A. ta puntra su mes kico ta e situacion financiero di Riu Palace Aruba den comparacion cu otro hotelnan. Ta di compronde cu e compania ta pasando den duro y ta mirando su interesnan so. No ta mirando e interes di empleadonan, bayendo di acuerdo pa pone un suma di placa. Pero awo cu tin e subsidio, nan ta bisa di no sigui cu e acuerdo. Ta pidiendo pa pone e 20% pasobra e hendenan tambe ta pasando den problema. Esnan cu ta haya tips a bay atras hopi den salario, ya cu e salario basico ta hopi abou. Den e tempo aki no por trata hende asina.