Den waf di Aruba Ports Authority (APA) por nota presencia di e barco crucero Regent Seven Seas Splendor, cu ta mara desde diaranson mainta. Regent Seven Seas Splendor a opta pa “lay up” na Aruba mientras cu e biahenan crucero ta suspendi temporalmente. E barco a yega sin ningun pasahero y tin solamente e capitan y miembronan di tripulacion. E barco crucero tin intencion di keda den nos waf pa mas o menos un luna.
Manera ta conoci, rond mundo tur compania crucero a suspende nan operacion boluntariamente debi na Covid-19. Te ainda e suspension boluntario for di Merca ta te cu 15 di September 2020 y ta pendiente si despues di e fecha aki por reanuda biahenan crucero of si esaki lo wordo extendi cu un otro periodo.
Regent Seven Seas Cruises antes conoci tambe como Radisson Seven Seas Cruises tin su oficina principal na Miami, Florida. E compania ta ofrece cruceronan cu ta bishita riba 300 waf rond mundo. Nan ta specialisa den barconan cu un capacidad chikito di pasahero. E barco Regent Seven Seas Splendor a drenta servicio e aña aki y a bira e di 5 crucero di e compania. E ta diseña pa acomoda no mas di 750 pasahero, tur den suitenan luhoso cu bista pa lama.
APA por confirma cu e tripulacion completo a cumpli cu tur e protocolnan di Departamento di Salud incluyendo e health screening mandatorio ora di yegada. Den e periodo cu e barco crucero ta den nos waf, ta percura cu e barco, mescos cu tur otro clientenan, ta cumpli cu reglanan y protocol vigente den cuadro di e normal nobo cu Aruba y mundo henter mester adapta na dje.