Presidente di Parlamento, mr. Ady Thijsen, a ricibi centenares di manifestantenan awe tardi dilanti edificio di Parlamento. Separa di adulto, a nota hopi mucha y hobennan cu a uni na e manifestacion “Ta basta” pa presiona politiconan, tanto den Parlamento como den Gobierno, pa haci algo AWO pa frena abusonan sexual tumando luga, specialmente contra mucha. E manifestantenan a pidi pa Parlamento cambia e leynan actual, pasobra ta sinti cu nan ta demasiado leve.
Cu 12 mil firma den man, a solicita di Parlamento pa pone e ley aki como prioridad. E ley cu Parlamento a adapta algun dia pasa, no ta suficiente pa e manifestantenan. A pidi pa den 30 dia haci e cambionan necesario pa evita cu lo tin mas victima inocente cu ta perde nan inocencia na man di burdugonan.
Presidente di Parlamento tabata compaña pa tur Fraccion den Parlamento, tanto di MEP, POR, RED y AVP. Remarcabel ta cu no a mira tur e lidernan di fraccion den Parlamento para pafo di edificio pa enfrenta e manifestantenan. Tur a scucha e demanda di e manifestantenan cu tabata grita pa cambia e leynan mas pronto posibel.
Ady Thijsen a priminti di lo haci cambio lihe, e no por a pone un fecha ainda, pero a keda di topa cu tur e partnernan cu ta traha cu leynan contra abuso sexual di mucha. Hunto lo mester sinta na mesa y mira con miho adapta nos leynan di inmoralidad. Manifestantenan tabata grita “Nos kier husticia” of tambe “Nos no ta pidi, nos ta exigi”.