Minister Presidente mr. Evelyn Wever-Croes a bisa na momento di acepta e manifiesto awe cu e ta masha contento di mira tanto hende riba pia. Den pasado durante tipo di manifestacionnan asina ta 20 of 30 hende so ta presenta. Awe sinembargo a mira cu e grupo ta hopi grandi. El a sigura di lo traha mas duro riba e cambionan den ley cu mester bin, na beneficio di e muchanan y evita mas caso di abuso sexual.
Separa di Minister Presidente, tambe tabata presente Minister di Husticia mr. Andin Bikker y Minister di Asuntonan Social, Glenbert Croes. Nan tambe a hiba palabra y a sigura cu lo no acepta mas abuso di mucha. Lo percura pa duna autoridadnan mas herment pa por atende casonan mas lihe posibel.
Minister Presidente a admiti cu e mes lo a desea pa e ley aki por a pasa mas lihe. El a priminti di lo pasa e ley aki den 6 minuut pero di berdad a ripara cu e no ta bay asina facil y despues di casi tres aña ainda no a logra completamente. Parlamento a caba di aumenta e castigonan siman pasa pero ta sinti cu comunidad lo kier mas castigo ainda. A priminti di lo tuma contacto cu e organisadonan pa pronto sinta na mesa cu Gobierno pa mira con lihe por haci e cambionan tan desea.
E manifestantenan pafo tabata grita “Nos no ta pidi, nos ta exigi”.
