Diamars media , den oranan di lunch break, ta pidi presencia di polis cu urgencia den area di hotel, serca di un compania di watersport banda di beach. Patruya cu a yega ta haye confronta cu un escena basta serio. Aventura riba lama di algun turitsa a bira un storia di horor na momento cu nan a enfrenta bientonan fuerte cu diripiente a cambia nan trip riba parasailing.
Alrededor di dies persona abordo di e boto cu nomber grandi riba dje Parasail di e compania Aruba watersport Center a subi lama pa un dia di diverticion. Un pareha turista mericano cu na su turno tabata den halto y explorando nos isla for di un haltura no a pensa niun momento cu algo lo por a bay malo den un fraccion di seconde.
Inesperadamente e tempo a cambia, tempo a cera, biento a lanta, awa a cuminsa yobe y den tur e factornan aki e boto a haye confronta cu e peliger di bolter. E Parasail a cuminsa tuma biento fuerte y cu esaki a cuminsa crea presion contrario. Capitan di e boto, Djopawiro Pascal Giorgio di Suriname a haye cu un desicion extremadamente dificil pa tuma. Entre e pareha cu tabata den halto of e ocho pasaheronan den e boto.
Mirando cu e boto a cuminsa mustra di cu e ta bay bolter, y cu intento pa baha e pareha no tabata resultando a purba un waterlanding cu no a bay manera e tabata desea. E parashoot ainda tabata crea presion y a bati e pareha den awa fuertemente. No a keda ningun otro opcion di corta e cabuya y laga e turistanan los y cay den awa cu al parecer lo tabata for di un haltura considerabel.
Fractura y situacion serio a presenta
E dama turista a haya golpi fuerte na brasa y curpa pero e turista masculino ta esun cu tabata encontra su mes den un situacion hopi mas serio. Inmediatamente a pidi presencia di ambulance pa bin asisti mirando cu e victima no tabata por a move y no tabata mustra mucho bon. A tuma nota cu dor di e golpi, cu tabata asina fuerte, e temor cu e lo a haya fractura grave cu tabata impidi su mobilidad. Cu urgencia e la keda transporta pa HOH caminda tratamento medico lo a indica kico tur lo ta e lesionnan ricibi. Ta spera cu pronto lo haya bon noticia di su recuperacion. Personal di slachtofferhulp a bin brinda sosten na e victimanan den momento di angustia.
Lamentabel cu den e posicion fragil cu nos Isla tin cu Turismo, ta pasa e tipo di accidentenan asina aki y crea un desconfiansa den capacidad di actividadnan cu nos Isla ta ofrese na nos bishitantenan. E caso sigur lo ta bou investigacion pa clarifica y sugeri kico por haci den situacionnan igual si acaso e presenta atrobe.
