Durante un conferencia di prensa, fraccion di partido AVP den Parlamento a presenta nan mes pa prome biaha na prensa local. A hiba palabra lider di fraccion, Sr. Marlon Sneek, como tambe parlamentarionan Sres. Arthur Dowers y Richard Arends. E ultimonan asumiendo ainda nan responsabilidad di minister di Pais Aruba. “Ta un honor di a wordo huramenta como parlamentario y sirbi mi pais den e calidad aki. Durante ultimo ocho añanan mi a asumi varios responsabilidad for di consehero te na minister. Awor mi ta un representante directo di pueblo di Aruba den e organo mas halto di nos pais,” e parlamentario y alaves mandatario a declara.
Durante e conferencia di prensa, Sr. Arends a indica cu e fraccion di AVPta refleha un combinacion di experiencia politico, experticio y tambe inovacion cla pa sigui sirbi interes di pueblo siendo e partido ganador di eleccion.“Nos lo vigila di serca ehecucion di maneho,” asina Sr. Arends a splika. “For di oposicion nos percura tambe pa loke a logra durante e ultimo ocho añanan no bay perdi.” Gabinetenan Mike Eman a inverti den energia, infrastructura y areanan publico, como tambe poder di compra ni e ciudadano. E plan di inversion aki tabata tin como meta pa jumpstart economia, crea cupo di trabow ymehora calidad di bida di nos hendenan. “Nos a opta conciente mente pa aumenta transferencianan social y e resultado di e esfuerzonan aki tabata cu e poder di compra di esunan cu un entrada di menos di Afl. 2500 pa luna a aumenta cu mas di 10%.”
Na momento cu Gabiente Mike Eman I a asumi responsabilidad na 2009, AVP tabata prepara pa goberna y no a drenta den gobernacion pa hasi estudio of analisis. “P’esey mes nos lo sigui fortifica e institutonan di partido manera Fundacion Digna Lacle y Fundacion pa Estudionan Social Cristian Dr. Mito Croes,” Sr. Arends a sigui splica. “Nos lo percura pa e temanan di programa di partido AVP keda wordo treci dilanti den tur aspecto manera solidaridad, sostenibilidad, husticia social, resposabilidad y prosperidad comparti.”
E parlamentario y tambe e actual titular di Asuntonan Economico y Comunicacion a splika cu e gobierno actual ta atendiendo e.o. asuntonan coriente y ta manetene gobernacion andando te na momento cu tin un gobierno nobo. E la finalisa bisando: “Na momento cu mester tuma un decision ora cu e situacion ta rekeri”
