Fraccion di AVP a tuma nota di e proceso di formacion y tin cu bisa cu gran sorpresa a bin realisa cu berdaderamente cu sr. Nelson Oduber a haya rason un bes mas ora di papia di su partido politico, esta MEP, caminda cu e ta bisa cu Gobernacion ta un cos y Campaña ta un otro cos. Segun parlamentario y minister demisionario Arthur Dowers a comenta durante di un conferencia di prensa convoca na cas di partido di AVP, cu por a mira un campaña sumamente fuerte di parti di partido MEP, contra di esnan cu awe nan ta forma nan Gobierno cun’e y a keda basta sorpresa, e forma con e personanan aki a habri brasa y core bula den otro su brasa hopi lihe despues cu e resultado di eleccion tabata drentando. No cu e tabata full cla. Na e momento ey a compronde cu ya prome cu eleccion tabata tin palabracion haci entre partido MEP y partido POR y tambe cu nan lo a combersa cu e partido di droga. Despues di esey tambe a bin compronde cu hopi lihe, despues lo a forma Gobierno. A bisa for di e anochi ey, cu e Gobierno aki mester bandona e stoel di Gobernacion mas lihe posibel. Si ta pa nan, lo ta e dia despues mes. Constitucion no ta permiti esey logicamente. Awor aki ta algun siman mas leu y te ainda no por mira un presentacion di un programa di gobernacion y tampoco por mira un presentacion di un Gobierno cu tabata tin tanto ansha pa sinta.
Hasta a bin compronde, den un declaracion di sr. Oduber, cu nan lo a papia prome cu eleccion caba, hasta cu hendenan cerca di Gobernador of gobernador mes, pa sede e Gobierno aki.
Pa AVP esaki ta sorpresivo. Sr. Dowers a comenta cu por a corda cu partido MEP a haci un denuncia na Ministerio Publico, caminda cu den e caso aki sr. Oduber, sra. Wever-Croes y sra. Ruiz-Maduro, a bay Ministerio Publico cu carta na man pa denuncia sr. Oduber pa corupcion. A pidi un investigacion. Pa AVP mester bin un claridad si e investigacion aki, nan kier pa e sigui awor aki si of no. Tin di compronde cu sra. Evelyn Wever-Croes a bisa cu tur cos ta koek en ei. Kiermen cu nan no kier investigacion mas. Tin di compronde cu Xiomara Ruiz-Maduro si kier e investigacion di sr. Oduber.
Sr. Dowers a splica cu nan ta bati biña cu awa den e dianan aki y no ta sigur ken ta bebe biña ni ken ta bebe awa. Loke sa ta cu si tin 7 glas cu mita di nan cu biña y mita di nan cu awa, bo ta haya algo cu bo no sa kico e ta, pero e glas aki no ta bira mas hopi. E grupo aki, e tres partidonan aki, cu kier forma un Gobierno, a bisa cu nan kier forma Gobierno di 7 minister. Awor aki por mira nan a yega mas cu 7 minister. Tin di compronde cu nan ta bayendo te banda di 10 ney y poco poco nan lo mira con ta haci cu otro pa yega bek na 8. En todo caso AVP lo ta hopi vigilante. Nan a traha cu 7 minister, na momento cu MEP a baha, lagando e pais den ruina y a traha sumamente duro pa trece e pais aki riba pia e tempo ey.
AVP sa cu por traha cu 7 minister. Sinembargo partido MEP, si nan tin argumentonan adicional pa traha cu 7 minister, cu nan ta bay spaar 70 miyon florin. Pueblo mester corda, cu partido MEP a bisa cu nan lo traha cu 7 minister. POR a bisa cu lo traha cu 7 minister, partido di droga lo traha cu 7 minister y cu lo spaar pueblo 70 miyon pa aña.
Ta spera cu por mira e 70 miyon besparing ey, mesora ora cu nan sinta cu nan 7 minister.
