Ta fastioso como mayor pa manda un yiu scol y despues scucha cu tabata tin pelea na scol. Nos no por bisa cu ta pa falta di mayor, pasobra hopi biaha peer pressure ta hunga un rol entre e muchanan mes. Scol tampoco no por yuda, pasobra hopi biaha ta pafo e muchanan ta dicidi di midi forsa y esey mes ta duna e scol un tinte negativo den comunidad. Esey ta loke cu a pasa diamars merdia na SPO Santa Cruz, ora cu polis a bay rapidamente pa asina intermedia.
Eynan un miembro di staff a papia cu polis, cu na e momento ey ya e pelea a caba. Prome cu esey, na caminda pa scol, polis a tuma nota di un grupo di studiante di e scol, ta core bay direccion di e brug, mustrando cu posiblemente e muchanan aki lo tabata envolvi den e pelea aki. Despues di a papia cu e funcionario, polis a bandona scol. Pero sin tira un bista den vecindario pa mira si nan por a topa cu e grupo.
