Den un otro intento di Parlamentario Ricardo Croes di RED pa urgi Gobierno pa legalisa cultivo di marihuana medicinal, a topa cu contratiempo ora cu 8 Parlamentario a vota contra y como tal no a haya sosten pa su mocion. El a logra convence Marisol Lopez y Daphne Lejuez pa presenta e mocion cune y vota na fabor di e mocion, pero tur otro a vota contra, cu consecuencia cu e mocion no a logra pasa den Parlamento.
Di acuerdo cu Ricardo Croes, como cu den tratamento di presupuesto 2019, e mesun Minister Xiomara Maduro a anuncia cu cultivo di marihuana medicinal ta parti di nos desaroyo economico y mirando cu Minister di Salud ta kedando cla cu e leynan pa aproba cannabis medicinal, el a urgi Parlamento pa pasa un mocion pa pidi Gobierno pa cuminsa legalisa e cultivo di marihuana bou di agricultornan local. Pero Ricardo Croes no a conta cu sosten di su coalicion, mientras cu Fraccion di AVP no tabata presente mes den Parlamento ora di votacion.
Loading...
Reload document 
Open in new tab Den su motivacion pa e mocion, Ricardo Croes ta corda su partnernan MEP y POR cu legalisacion di marihuana medicinal ta forma parti di nan acuerdo di gobernacion. E mocion ta pa habri e mercado di cultivo, sea directo of indirecto, bou di agricultornan.
Pero e sosten cu RED a haya tabata masha limita. Un miembro di MEP y un di POR a sostene mientras cu Parlamentario Howell di POR den su motivacion a dedica un bon rato pa splica dicon e ta contra. E ta bin for di Polis y lo bira dificil pa e sostene cultivo di marihuana si e rapport oficial di marihuana medicinal mes no ta cla ainda. Rocco Tjon di MEP ta pensa mesun cos. Pero asina mes Marisol Tromp (POR) y Daphne Lejuez (MEP) a vota na fabor di e mocion.
Parlamentarionan Ady Thijsen, Setty Christiaans, Endy Croes, Hendrik Tevreden, Rocco Tjon, Shailiny Tromp, Edgar Vrolijk di MEP y Alan Howell di POR a vota contra. Di e forma aki a desaproba e mocion cu 3 voto na fabor y 8 voto contra.
