“Nos bida ta yen di reto y p’esey esaki ta un reto cu tin unda cu kier pa e scol di ofishi ta algo importante den henter mundo. Awor aki ta pone mas enfasis riba tur loke ta formacion di ofishi,” segun Minister di Enseñansa, Rudy Lampe.
Gobierno ta duna tur atencion na e problema cu tin actualmente. P’esey como minister, a surgi diferente pregunta. Mesora el a bin atende cu e pregunta di e docentenan cu ta laborando na OAA pa loke ta scol di ofishi.
Ta aprecia enormemente cu pa hopi aña e maestronan aki, boluntariamente, a ofrece pa sacrifica nan anochi pa bin duna e formacion na nos hoben y adultonan. Esaki ta, contrario na mainta, cual ta pa mucha y hobennan, ta pa adultonan.
Ta aprecia esey enormemente, segun e minister. Un dado momento a bisa nan tambe cu ta compronde cu despues di hopi aña, si nan bisa cu e condicion di loke ta paga pa e trabao di maestro anochi, si e no ta atractivo mas pa nan, pa motibo di belasting, pa motibo con e sistema di contract di losse uren ta hinca den otro.
Si e no ta atractivo mas pa nan, ta respeta nan decision. Hopi di nan a sacrifica nan anochi cu nan famia, pa nan duna les.
E Minister a bin pa scucha nan preocupacion y expresa na nan cu cualkier decision cu nan tuma, nan ta respeta esey y ta gradicido pa tur e añanan cu nan a duna na scol di ofishi. E ora ta responsabilidad di gobierno, respetando nan decision pa continua cu e scol di ofishi. A expresa esey tambe den tur e periodo cu Lampe tabata minister di enseñansa. No a core cu ningun hende, no tabata tin conflicto laboral, no a kita ningun hende na trabao, no a torno salario di ningun hende. Tur maestro a mantene nan posicion huridico.
Tur maestro den nos sistema enseñansa, tin nan salario y tin mas espacio pa mas maestro. Tin scarsedad di maestro, segun e mandatario. E preguntanan cu tin awor aki, no tin di haber cu un conflicto laboral. Ningun hende a perde trabao, ningun hende a bay atras den nan posicion huridico. Tur loke ta nos maestronan cu tin un trabao full time, a respeta esey y ta aprecia esey.
E discusion cu tin awor aki, ta si realmente nan kier sacrifica un anochi of no, banda di nan trabao full time of di nan pensioen cu nan tin, pa bin haci e trabao aki cu ta necesario. Si e no ta atractivo pa nan, e ora tin cu respeta cu nan a duna caba suficiente di nan bida pa e trabao aki.
Si no tin alumno no tin curso
Si no tin suficiente alumno pa cada grupo, pasobra esey si ta importante, no ta bay habri un opleiding pa algun alumno cu e ora financieramente bo no por carg’e. Pero si tin suficiente alumno cu ta haci’e financieramente cu bo por carg’e, e ora ey ta obligacion di gobierno pa esakinan continua.
Innovacion cu tin den enseñansa tambe ta haci cu ta pensa awor aki rond mundo. Por ehempel ta bayendo den direccion cu no ta ofrece un opleiding di tanto aña, principalmente si ta enseñansa di adulto. Ta ofrece cursonan cortico cu ta termina cu un certificado. Cu un acumulacion di certificado ta bira e ora un diploma. Abo como adulto ta scoge den ki periodo bo ta haci e proximo curso cortico. E idea innovativo aki ta bay aplica tambe pa loke ta scol di ofishi cu te awor aki tabata tin un otro sistema. Un sistema cu tin un curso di full un aña y tin tanto aña pa cab’e. Esey no ta e trend mas na nivel internacional. Aruba ta den un mundo cu tin asina hopi cambio, cu no por keda los di e cambionan aki.
Tin cu wak e lista di alumno, cu si tin suficiente inscribi, cu ta bisa cu financieramente e ta duradero pa por carga esey. No ta bay habri un curso pa un alumno. Tin di compronde cu tabata e tradicion cu te na ultimo ora, a ainda tin hopi inscripcion. Pesey tin cu warda te e ultimo momento pa tin un bista realmente cuanto alumno a inscribi.
