A muda Warda di Polis pa turistanan pa stacion di bus

Ayera a inaugura e oficina di Tourism Oriented Policing di Cuerpo Policial Aruba. E “Warda di Polis” nobo aki ta situa na e di dos piso di e central di Arubus na Oranjestad. Un oficina dedica na servicio pa turista cu ta e pilar economico di pais Aruba.

E “Warda di Polis” specifico aki a muda di Renaissance Marketplace pa Arubus. E proyecto aki ta conta cu e sosten financiero di Aruba Hospitality & Security Foundation (AHSF), cu ta conta cu fondonan disponibel for di ATA y AHATA.

TOP awor ta mas cerca di e area di cruceronan unda turistanan ta bishita tienda y ta cana bay caya principal. Cu apertura di e oficina ta subraya siguridad di e turistanan, algo primordial pa comunidad.

E oficina  ta un iniciativa hunto cu AHSF, AHATA y Cuerpo Policial. Segun Minister Bikker e ta hopi gradici cu Minister di Tursimo Sr. Dangui Oduber pe e cooperacion estrecho  y den futuro cercano ta bay tin mas proyecto conhunto basa riba e cooperacion cu sector priva. TOP ta den cuadro di optimalisa siguridad di henter pueblo y e bishitante.