Diasabra 20 di juli lo ta mita siglo pasa cu Neil Armstrong a pone su prome paso riba luna y na e momentonan aki e Projecto Lunar Zebro ta bezig pa hiba e prome Rover Hulandes luna.
E projecto ta un projecto di facultad di TU Delft (Universidad di Technologia di Delft), cu a cuminsa na aña 2017, na unda profesornan di e facultad di e universidad y studiantenan ta traha hunto den coperacion cu otro partnernan. Entre e studiantenan tin tres ex-studiante di Colegio Arubano trahando activamente riba e projecto. Nan ta Jillian Oduber, Roderick Tapia y Claudia Sweerts. E projecto no lo bira djies e prome Rover Hulandes riba luna, pero tambe esun di mas chikito y di menos peso.
Plan pa lansamento na aña 2022
Ta realisando e mision cu plan pa lansa e Zebro na aña 2022. E meta principal ta, te awo, pa test si e Rover por resisti di dia cla lunar riba luna. Di dia cla lunar ta dura mas of menos dos siman di tera (14 dia). Un reto basta pisa pa un robot chikito, pasobra e Zebro apenas ta pisa 2 kilo, ta mas chikito cu un papel size A-4, cu ta 210 × 297 mm. E ta traha ful cu energia solar. Esaki kemen cu e Zebro lo functiona den dia cla lunar y lo ta den comunicacion cu tera.
Condicionnan di luna
Esaki kemen tambe cu e mester por midi forsa cu e condicionnan hopi dificil cu tin riba luna. Por ehempel e diferencianan extremo den temperatura, e exposicion na e radiacion di solo, e paisahenan bruto y rof y e ‘moondust’ fini cu ta penetra tur caminda. P’esey ta construi e Rover cu un material inovativo cu yama Ceramix Matric Composite (CMC), special traha resistente pa den espacio. Despues ta bin riba e material aki barios capa di material di isolacion.
Grupo di Rover
E idea di e mini Rovernan aki por parse un locura compara cu e Rovernan grandi y conventional, pero hecho ta cu, los di costa menos, nan tin e habilidad di por haci trabounan mas complica. Jillian ta splica cu: “E prospecto ta tambe pa den futuro manda hopi di Rovernan aki luna hunto. Eynan nan lo copera cu otro den gruponan grandi pa cumpli cu e trabounan complica. Imagina por ehempel con e vruminganan ta traha hunto y copera cu otro.” Roderick ta sigui splica: “Di e manera aki por explora mas eficiente hopi mas tereno. Tambe por investiga luganan cu di otro manera lo ta un riesgo y/of lo ta inaccesibel pa e Rovernan grandi y caro, manera e cueva y craternan lunar. Motibo pakico e robot chikitonan aki tin 6 pia den forma di e letter C y cu cada un di e pianan ta traha independiente for di otro. Cana, subi, baha, tene, wanta den e paisahe lunar lo no forma un problema pa nan. Na tin tambe dos camara, diseña y traha door di studiantenan di TU Delft, cu ta funciona manera un par di wowo cu ta guianan pasa over y/of rond obstaculonan”. 
Final di e mision
Con e mision aki lo yega su fin ta keda un suspenso. Ta trahando hopi duro pa perfectiona e Zebro pa e por ta resistente na e condicionnan extremo lunar. Esaki ta un must pa e Rover yen di curashi por enfrenta y prevalece cu exito su estadia largo y dificil den dia cla lunar. Claudia ta sali cu entusiasmo for di e punto di bista cu e mision lo logra y ta di opinion cu “Den un tempo cortico despues di a celebra e jubileo di 50 aña di a yega luna, nos tambe lo por celebra e yegada di e prome Rover Hulandes, e Zebro, riba luna”.
