Departamento di Obra Publico ta informa pueblo di Aruba en general y specialmente nos automobilistanan cu ta haci uzo di e area di Kerkstraat/Caya Ernesto Petronia cu dialuna awo dia 22 di juli 2019 lo cuminsa cu trabounan di embeyecemento dilanti di Pro Catedral San Francisco di Asis.
E trabounan ta encera instalacion di iluminacion, construccion di e area di peaton, construccion di e caminda dilanti y panort di e Catedral cu klinkers y re-structura e parkeerplaats. Ta bay haci e trabounan den fase y lo cuminsa cu preparacion di cobamento y construccion panort y dilanti di Rosa College y lo sigui dilanti di e Catedral.
Despues ta sigui pabou di e Catedral (ex Circle K) cu e construccion pa re-structura e parkeerplaats. E trabounan menciona lo tin un duracion di 100 dia di trabou.
En conexion cu e trabounan menciona Departamento di Obra Publico ta haci un peticion na tur automobilista y busnan pa tene cuenta cu no por haci uzo di e parkeerplaats na altura di e Pro Catedral San Fransisco di Asis, ni dilanti Ex Circle K.
