E prome caso tabata na FCCA tempo di coalicion cu Charro Kelly di ADN como Minister di Infrastructura y di dos tabata un otro Gobierno di MEP cu Marisol Lopez como Minister di Infrastructura. Awe mainta Hues a bay di acuerdo cu Gobierno, como doño di Utilities Aruba NV, pa compensa Drs. Franklin Hoevertsz cu un pago di Afl. 166.540,= pa e bandona su puesto di Director di Utilities Aruba NV entrante 1 di mei 2019. E suma concedi ta menos cu su demanda.
Abogado mr. Olivia Sjiem Fat a presenta na Corte awe mainta pa scucha e sentencia pa su tata Hans Sjiem Fat di Bufete Sjiem Fat & Co., mientras cu abogado mr. Celina Wever a representa su colega Anthony Ruiz di bufete Croes-Wever-Ruiz, kendenan ta abogado di Utilities Aruba NV y di e doño di compania, esta Gobierno di Aruba.
E doño di Utilities Aruba NV a bisa Hues di no tin confiansa mas den Franklin Hoevertsz pa e sigui na timon di e compania. Hues a puntra si nan a negocia y e Presidente di Hunta di Supervision, Richard Eman, a bisa cu no, cu e ta prefera pa Corte mes dicidi kico ta “fair” pa ambos partido bay foFr di otro. Hues dia 14 di maart ultimo, dia cu a trata e caso, a alerta Eman cu asina e sentencia por bay tur banda….pa e ta consciente di esey.
Awe mainta Hues mr. Debbie Angela a lesa e sentencia den sala di Corte. Hues a bay di acuerdo pa desolve e contract di trabou di Franklin Hoevertsz, cu lo caba otro aña ora e cumpli 65 aña di edad. Pues e compensacion pidi ta pa e yega su edad di pensioen. Esey mes ta locual Corte a tene na consideracion den nan formula pa yega na un suma pa partidonan bay for di otro.
E hecho cu mester paga un compensacion ta pasobra Hoevertsz no a comete ningun acto contra ley of contra maneho di e compania. E Gobierno di asignatura geel ta sinti cu den pasado e maneho di Utilities Aruba NV tabata hopi “berde” pa cual su defensa a splica e Magistrado cu como Director di un compania di Gobierno mester sigui e liña di maneho di bo doño di trabou.
Den e sentencia partidonan a haya 2 siman pa apela den caso cu un di nan no ta di acuerdo cu e decision di Hues.
