SELIKOR KU TREINEN DI ERGONOMIA PA E HEFENAN OPERASHONAL

E aspektonan di seguridat i salú ta importante pa Selikor NV i ta kore manera un liña kòrá sigur ora ta trata maneho di su personal. E mesun aspektonan akí ta importante ora ta trata di e servisio ku nos ta brinda na komunidat pa e personal ta den bon kondishon físiko pa duna un servisio di kalidat haltu.

Na inisio di aña 2017 gerensia di Selikor a indiká ku lo bai sigui pone énfasis riba salú di e trahadó individual i ku lo bai tin diferente aktividat ku ta dirigí
riba seguridat i salú. Den e kuadro akí departamentu di Rekurso Humano a organisá un siman di treinen di ergonomia kaminda tur hefe operashonal lo pasa un trayekto di treinen di forma ku nan por duna instrukshon na e sobrá personal operashonal di Selikor. E meta prinsipal ta pa trahadónan di Selikor por duna un kalidat di trabou na nivel i alabes keda ku energia durante i despues di trabou. Naturalmente ta konta ku e trahadó mester por funshoná evitando riesgo di aksidente riba trabou. Durante e siman di 25 te ku 28 di sèptèmber e hefenan a risibí diferente instrukshon basá riba teoria i práktika ku puntonan ku mester paga tinu riba dje. E treinen ta konsentrá prinsipalmente riba e posishon di sinta, lanta, kana i otro moveshonnan ku e trahadó ta hasi durante dia. E konosementu ku e hefenan operashonal atkerí mester pas’é na tur sobrá trahadó. E treinen ta na enkargo di SPA Opleidingen, un instituto di Hulanda ku eksperensia amplio ku kompanianan ku ta hiba maneho di limpiesa. Ku e treinen di instrukshon di ergonomia akí Selikor ke logra evitá eventual aksidente bou di ora di trabou.