Frakshon di PAR ta para ketu na 30 aña di e tratado di Derecho di Mucha. Asamblea General di Nashonnan uní den 30 aña pasa a ratifiká den kolaborashon ku paisnan di mundu un tratado internashonal ku 54 artíkulo, ku ta salbaguardiá e derecho di kada mucha i hóben.

Antia Hulandes, na aña 1998 i pais Kòrsou na aña 2010, a ratifiká e tratado aseptando e responsabilidat di kumpli ku e tratado. Segun e enkargo di Gabinete Rhuggenaath, grupo di enfoke di derecho di mucha na aña 2018 a entregá un rapòrt pa loke ta trata e nesesidatnan di e mucha i hóben.

Un punto importante di e rapòrt aki ta finalisashon di e plan nashonal kontra maltrato di mucha, ku a keda implementá pa ministerio di SOAW. Otro un rekomendashon ta introdukshon di un Ombudsman i Parlamento di Kòrsou ta tratando e lei pa introdusí esaki. Frakshon di PAR ta tuma nota ku satisfakshon e introdukshon di un eksámen uniforme pa AGO i firmamentu di e tratado pa ku rekonosementu di diploma i títulonan den region, asina aki kumpliendo ku e tratado di derecho di mucha i hóben, ademas ku e agènda 2030 di Nashonnan Uni.

Punto nan di atenshon entre otro; finalisá e lei di paternidat, derecho di nòmber di baby ku nase sin bida, transporte públiko aksesibel i pagabel pa garantisá partisipashon aktivo na aktividat di rekreashon i un regulashon general i strukturá di kuido sosial di nos mucha i hóbennan (jeugdhulpverlening) ta keda pendiente pa resolvé ku urgensia. Frakshon di PAR ta mira e trabounan ku ta keda realisá pa Parlamento, Gobièrnu Rhuggenaath i tambe organisashon sosial i komunidat kompletu. Riba dia internashonal di derecho di mucha i tur dia laga nos sigui hasi e trabounan nesesario na bienestar di nos muchanan.

Comments

comments