E homber Raymy Hernandis cu a los tiro riba Luis Maduro den Dakota a entrega su mes. Diasabra den oranan di atardi, pasa di 5’or, hunto cu su abogado, mr. Chris Lejuez el a entrega su mes na warda di recherche, den Frankrijkstraat.
E tabata wordo busca pa motibo di e tiramento y a sinti cu dado momento nan lo busk’e, pasobra nan sa kende e ta.
E no a entrega su mes cu e arma cu el a usa den e tiramento. E mes lo a bisa abogado cu ta tres tiro e lo a los riba Luis Maduro. Nan dos tin problema.
Segun e prome version di Raymy Hernandis, e ta bisa cu nan dos ya pa algun tempo caba tin problema pasobra na diferente ocasion, Luis Maduro a yega di menas’e cu morto. Hasta e lo a laga sa na un of mas famia, cu e tin un bala y e bala tin un nomber riba dje, cual ta Raymy Hernandis.
Na dado momento, diferente biaha, segun Raymy Hernandis a bisa abogado, cu el a yega di wordo menasa cu morto caba y e cos aki ta cos cu ta anda for di tempo cu Luis Maduro tabata cera pa un asesinato.
Luis Maduro ta esun cu a tira den Havana y heridando un persona inocente. El a tira riba otro hende y a herida un damita cu tabata cu Havana hunto cu su famia e momento ey. E damita a fayece despues di algun dia.
Mientras tanto el a sinta 10 aña y e ta afo. E no ta cera mas. Awor aki tin problema cu otronan cu ta biba tambe den e zona di Dakota.
Parce cu segun Luis Maduro, tempo e tabata cera, Raymy Hernandis mester a pag’e un suma di placa pa un scooter, cual segun Raymy Hernandis el a paga esaki completo, pero aparentemente Luis Maduro kiermen, cu e no a wordo paga.
E debe placa riba e scooter. Eynan ta caminda cu tin e problema, cu discusion, cu tiramento di palabra, cu menasa di morto, cu consecuencia cu diasabra, Raymy Hernandis a bay asina leu di bay den Dakota, of topa cu Luis Maduro y ta los tres tiro sigur, cu a alcansa Luis Maduro, cu a logra core, a drenta cas di hende y despues a logra haya un yudansa, yega te warda di polis na Playa, unda cu a pidi un ambulance cu urgencia y transporte pa hospital.
Su situacion ta critico, esta di Luis Maduro. Di atardi caba tur hende tabata sa kende ta esun cu a comete e acto aki.
Y pa 5’or mas of menos, Raymy Hernandis a entrega su mes na warda di Recherche, pendiente investigacion. Awor aki, a base di interogacion tambe, ta bay busca drechi di e arma di candela cu el a usa pa los tiro riba Luis Maduro, cu ta biba den Caya Papa Huan Pablo den Dakota.
