Etlien Croes ta docente di EPB y conhuntamente cu algun docente cu ta chef di colegio EPI, nan a duna splicacion y pa invita pueblo pa un evento di competencia di 8 cuminda crioyo.
Kico e competencia ta encera
Esaki ta encera cu tin 20 koki di cas cu lo guia 20 studiante. 10 di EPB y 10 di EPI. Cu otro palabra, e 20 kokinan di cas aki lo pasa e conocemento di con pa cushina ocho diferente cuminda crioyo na nos hobennan. Ora cu nan caba, lo tin oportunidad pa cumpra e cumindanan aki. E evento aki lo ta completamente bao di guia di un chef, kende ta docente di EPI. E evento lo tuma luga diadomingo, dia 3 di December, cu ta aki dos siman y e lo tuma luga na EPI.
Orario cu por cumpra cuminda ta entre 10’or y mey di mainta y 3’or di atardi. Lo bay tin 8 diferente plato.
Koki di cas
Koki di cas, den e sentido aki ta ama di cas, of tata di cas, of si tin un hende na cas cu sa cushina cierto cuminda criyoyo y por traspasa e conocemento na e studiantenan. Mirando cu e parti di cuminda criyoyo a bay hopi perdi y lo ta miho pa cuminsa na e parti di educacion, caminda cu ta siña e muchanan con pa cushina cuminda criyoyo.
Studiantenan selecta
Aki tin 10 studiante di EPB y hunto cu e manager a scoge cua ta e muchanan cu lo participa. E parti di EPI tabata e chefnan cu ta e docentenan di EPI, nan a scoge kennan lo participa.
E union pa e proyecto
Segun Croes, esaki ta fantastico, pasobra a yega ora pa nos rebiba nos identidad Arubiano, cua ta e cuminda crioyo, nos idioma papiamento, nos bandera, nos escudo. Tur ta forma parti di nos identidad. E idea aki ta fantastico, el a ripiti.
