Durante di siman di 19 pa 25 di Februari, Flex Team a tene varios control na diferente punto strategico riba nos isla. Entre otro nan a bay luganan conoci manera Manuelitos, Hotel Bacarat, casnan di pueblo na Noord y Madiki, casnan di pueblo na Sero Patrishi, unda cu un biaha mas nan a baha cu man duro.
Localidadnan manera Lekker, Olde Molen y Cas Casuela, a wordo controla y a percura pa tur hende cumpli cu e orario di ceramento y pa tur hende bay cas di biaha.
Aglomeracion na Eagle Beach
Tur grupo cu durante di e oranan di anochi tabata para na altura di Eagle Beach y cu tabata bezig ta disfruta di bebidanan alcoholico y musica duro, a ricibi nan scual y a wordo cori di e sitio.
Aglomeracion riba parkinglot di The Village
Mescos cu na Eagle Beach, tur grupo cu tabata para riba e parkinglot di The Village den oranan di anochi y ta disfruta di bebidanan alcoholico, a ricibi nan scual y a wordo cori di e sitio.
Buskeda y aresto
Durante e fin di siman di dia 23 pa dia 25 di Februari, Flex Team a tene varios aresto. Algun di nan tabata buskeda y aresto, y otronan, pa pura casualidad nan a bin topa cu individuonan cu tabata sea portador of tabata uzando droga e momento ey.
Un di nan tabata riba diabierna, 23 di Februari, den careda di 11’or y 50 di anochi. E agentenan tabata durante nan control den Paardenbaaistraat, nan a pasa un auto Honda Fit, cu un holo fuerte di marihuana kima. Na e momento ey no tabata tin ningun otro auto cu tabata pasando. E auto a drenta Driemasterstraat y a keda core direccion nort. Yegando na altura di Bar A Bar, e chauffeur di e auto a ricibi seña pa para. Na momento cu polis a acerca e auto, por a nota cu tabata tin tres persona den e auto. Tambe por a mira cu un dama cu tabata sinta parti patras die auto, tabata bezig ta spuit un substancia dene auto pa dek e holo di e marihuana. E chauffeur y e otro ocupantenan a wordo pidi pa sali for di e auto. Durante un investigacion den e auto, a topa cu un saco di plastic cu un cierto cantidad di marihuana den un tas preto parti patras riab e sienta. Esaki a wordo confisca pa mas investigacion. E sospechoso GC, cu tabata sinta parti patras banda di e tas preto, a wordo deteni.
Tambe, durante un control den Visstraat, diasabra, 24 di Februari, banda pabao di un percela den Ranchostraat, a mira un Nissan March color plata, staciona banda robes di e caminda. Pafo di e auto na banda di e chauffeur, tabata para e conocido hobennan H, S y P. Mirando patruya, nan a core bay direccion un cas den Ranchostraat y a bay sconde den un cas. E chauffeur ta un conocido di polis. A rista na su pa±a, a bin haya den e saco dilanti robes, un tas color preto cu Ipop skirbi riba dje. Den dje a haya tres pildo parecido na pildonan di XTC. Esakinan a wordo confisca.
E sospechoso H. a keda deteni relaciona cu e caso aki.
Diadomingo, 25 di Februari, den oranan di marduga, polis tabata teniendo nan control un biaha mas den Visstraat y na altura di e crusada entre Visstraat y Avenida Alo Tromp, a mira e conocido T. Di biaha a baha for di patruya y a acerca T. Akinan por a nota cu e tabata tin algo duro wanta den su palma robes. Den pasado T. a wordo aresta varios biaha pa droga. A pidie pa habri su man, cual el a haci tambe. Den su man, por a nota cinco florin, un lighter cora y un saco chikito di plastic cu un cierto cantidad di cocaina. E droga a wordo confisca pa mas investigacion y e sospechoso a wordo aresta.
Control riba clubnan nocturno
Pa loke ta e fin di siman specifico aki, cos tabata hopi rustig, apesar cu e clubnan tabata wordo bon bishita.
Durante e siman di 19 pa 25 di Februari, varios auto a wordo controla, den diferente bario y a bin haya y confisca varios cantidad di droga, sker, grinder y tambe cuchiu.
Pa tin un bista di e siman, un total di 113 control a wordo efectua, di cual 5 persona a keda deteni. Dos cual ta buskeda y detencion y tres di nan ta relaciona cu droga.
