Un rato pasa a actualisa e datonan relaciona cu casonan confirma di Coronavirus na Aruba. E cifranan ta mustra cu mas hende a recupera, desde cu e prome casonan a manifesta dia 13 di maart 2020. Pero tambe interesante ta pa scucha pensamento di un experto, dr. Choudhry, cu a bisa di ta orguyoso cu Aruba ta bezig ta “Flatten the curve”.
Tur instancianan a bin ta encurashando e pueblo pa keda cas, mantene distancia social y hiba un regimen di higiena labando man. Ta di e forma aki paisnan manera South Korea a logra “Flatten the Curve”.
Na Aruba e cifra total di casonan raporta positivo te cu awo a bira 82. Sinembargo e noticia tambe ta cu tin 6 pashent mas cu a test negativo, pues a recupera, despues di tabata infecta. Esaki ta nifica cu tin un total di 20 persona cu a logra recupera di COVID-19, y esey ta nifica cu e cantidad di casonan activo ta 62.
Te aworaki 926 persona a test negativo. Te cu ayera tabatin 10 persona den hospital, di cual 4 tabata den cuido intensivo. Ayera nochi Prome Minister Evelyn Wever Croes a anuncia cu a haci un peticion na Hulanda pa ayudo den sector di salud publico y a logra haya 12 cama pa cuido intensivo, cu e aparatonan necesario.
E siman aki tambe por a lesa un comentario di dr. Choudhry riba su Facebook, unda e ta felicitando Aruba pa motibo cu ta logrando di “flatten the curve”.
Den su comentario e ta bisa: “Currently in Aruba we have successfully flattened the curve, 878 tested negative, 71 positive of which 14 have recovered which leaves 60 cases positive and 0 deceased. With the current strategy (shelter in place well enforced by the government, strict hygiene measures, low threshold for case finding) we have bend our curve. I am very proud of the current teamwork of all parties reaching from the hospital to the government. Lets keep working together and beat COVID19. This way we can create herd immunity and protect the vulnerable group. Hunto nos por combatie!”
Den un publicacion mas nobo dr. Choudhry a bisa di estudionan cu ta mustra cu 5 pa 80% di indviduonan por ta a-sintomatico durante e infeccion di COVID-19. Y e ta bisa cu “Preventing local transmission is an aggressive approach during the first response which includes shelter in place, toque de queda (curfew), social distancing and strict hygiene measures which have flattened our curve successfully. A low threshold of case finding (for instance screening asymptomatic individuals in the first ring of contact with a index patient, despite symptoms) could be a potential strategy to prevent more local transmission on Aruba and flatten the curve even further. Only with data we can strengthen our strategies and stay ahead of COVID-19.”
Kico ta ‘flattening the curve’?
E “curve” den un epidemia ta e cifra proyecta di personanan cu lo bira malo riba cierto periodo di tempo.
Un aumento agudo den e curva ta nifica cu e malesa ta plamando rapidamente, cu lo por conduci cu hopi hende ta wordo infecta na mesun momento y ta agobia e sistema di salud cu no por atende cu esaki.
Ora ta papia di “flatter curve”, e ta nifica cu tin un nivel di infeccion mas slow y mientras cu e mesun cantidad di hende en general por tuma luga riba un periodo mas largo di tempo.
E ta nifica cu e cantidad di casonan na momento di “peak” di e malesa – e punto mas halto di e chart – lo ta mas chikito, haciendo posibel cu e servicio di salud por atende di un miho forma cu e situacion y provee e cuido adecuado.
Medidanan pa contene e malesa – manera distanciamento social – tin e meta pa baha velocidad di infeccion y, consecuentemente, “flatten the curve”.
Manera raporta ayera, tres pais Europeo, a dicidi pa cuminsa suavisa medidanan, despues di a haya cooperacion di pueblo cu a mantene nan mes na e medidanan pa evita mas contagio. Ta trata aki di Austria, Checoslovakia y Dinamarca.
