Biblioteca Nacional Aruba ta haci hopi esfuerso pa pone material informativo y literatura online pa medio di su archivo digital. Usuarionan por haya acceso pa medio di e website di biblioteca www.bibliotecanacional.aw of directamente riba e plataforma.
Tin hopi hende y studiante na cas cu ta buscando material pa lesa, pa investiga y pa sa mas di Aruba su historia, cultura y literatura. E siman aki a enrikece e coleccion digital cu dos joya mas. Ta trata di obra di dos autor local bon conoci den nos comunidad. Usuarionan por lesa e buki ‘Den kibra di marduga’ di autor Desiree Correa. Y e di dos buki ta e obra tan popular ‘ E fucu di e Piedra Pretonan: Mi amiga Paulina’ di autor Yolanda Croes.
Desiree Correa (’53) ta bon conoci den e mundo di buki na Aruba. Desde su debut cu e buki na Hulandes pa hoben, ‘Mosa’s Eiland’, na aña 1984, cual keto bay ta wordo lesa na scol, Desiree a sigui produci obra pa mucha y na Papiamento. Varios buki a sigui despues di ‘Mosa’s eiland’ como por ehempel: ‘Un Nomber pa e Prinses’, ‘Un chispa di Tempo’, ‘Compa Nanzi’, ‘Drumi dushi’, ‘Domi di den mondi’, ‘Doño di curpa’ y ‘Manuel’ ta mas dirigi riba e grupo meta hoben. Desiree a participa como 15 aña na e Festival di Buki pa Mucha y te ainda ta hopi activo den promocion di lesamento cerca mucha ‘. Prome autornan di buki pa mucha local cu a yuda duna contenido na e prome festival tabata Desiree Correa, Josette Daal, Frances Kelly y Richard Piternella. Desiree Correa a traha tambe cu e Proyecto Idioma di Departamento di Enseñansa. Den su tempo liber e ta haci hopi traduccion y naturalmente e ta sigui cu e pasion di su bida cu ta skirbimento. Si ta desea contacto cu Correa por bishita su pagina riba Facebook.
Publicacion online pa medio di biblioteca su plataforma digital ta un cooperacion entre dos autor Yolanda Croes, Desiree Correa y Biblioteca Nacional Aruba pa facilita y stimula lesamento di literatura pa scol (of pa placer) na cas.
E fucu di e piedra pretonan: mi amiga Paulina
Yolanda Croes ta un autor local bon conoci y hopi productivo. Algun di su bukinan ta: ‘Unda Bo Ta Mami?’, ‘Perdi riba lama’, ‘Acompaña pa un angel : e tragedia di buelo 2000’ y ‘E fucu di e piedra pretonan’ tambe ta bon gusta. Ademas e ta director di Fundacion Scol di idioma, e ta biba na Sero Colorado y ta conoci tambe como cantante y musico. Den su oranan liber e ta toca guitara y tabata tin su propio banda ‘E Motibo’.
Diariamente Biblioteca Nacional Aruba ta traha riba su plataforma digital y mas y mas publicacion ta bin aserca cu mundo por accesa for di cas mes. Corant, documentacion, potret, buki pa mucha y obra literario. Pues e invitacion tey pa pueblo bishita biblioteca online.
