Dia tres di juni hues a pospone tratamento di e caso di asesinato cometi riba Sayuri Petronia. E caso aki lo bin dilanti un biaha mas awe mainta, caminda cu ta spera cu e biaha aki si lo por trata e caso completo pa asina hues por yega na un veredicto.
E dos acusadonan Zuriel Celaire y Izak Principaal no tabata den sala di Corte durante e tratamento di e caso riba e fecha menciona, ya cu tabata sa cu no lo a trata e caso e dia ey mas. Esunnan cu si tabata presente tabata nan abogadonan, entre otro mr. Demis Illes, kende ta representa un di nan den e caso di asesinato. Nan tin diferente abogado, pa e diferente caso.
Locual cu por a compronde cu, e motibo cu a pospone ta cu, a pesar cu a pidi e rapport casi 2 luna pasa, ainda e no a keda cla. Hues a informa di biaha cu el a haya siguransa cu pa dia 24 di juni proximo, e rapportnan lo ta cla. Como cu riba e fecha ey e tin caso, el a dicidi di pone di biaha riba rol. Ta locual a tuma luga tambe y como tal e caso ta poni pa tuma luga awe den corte.
