Esaki ta e gran historia cu ta para skirbi den Genesis capitulo 26:1-6. Aki nan tur hende por lesa con e obediencia di Abraham na Dios a resulta den bendicion pa Isaac hasta despues cu Abraham a muri.
Pasobra Dios no a lubida su pacto cu Abraham, ni tampoco con Abraham a cumpli cu Su orden y Su mandamentonan. Y Isaac a obedece Dios y a mira milager di Dios cumpli den su bida, pasobra locual Dios priminti, E ta cumpli cu ne.
Den tempo di secura , hamber y escasez extremo, Isaac tambe a obedece Dios , y a keda den Su presencia, y no bay Egipto, cual ta nifica fisicamente no a bay den paganismo, no bay caminda tin diosnan falso, y den un palabra moderno bisa, no bay mundo, bay busca nada, pero den tempo dificil, el a obedece Dios y Dios a bendicion’e grandemente.
Isaac a keda biba na Gerar, caminda Dios a bis’e pa biba, y eynan el a cosecha e milager di su obediencia na Dios y tambe e por a mira, cu Dios no a lubida e obediencia di su tata.
Hopi yiu awendia no ta mirando ehempel ey den nan mayornan, y esey ta algo hopi importante pa bida di un mucha. Specialmente bida di un hoben ora e lanta den un cas caminda e mayornan ta sirbi y obedece Dios den tur cos, pasobra e hoben lo siña acudi cerca Dios, y spera den Señor.
E mayornan ta responsabel dilanti Dios pa nan yiunan, nan ta esunnan prome yama pa educa nan yiunan y lanta nan den e disciplina y coreccion di Señor, pero mayornan mester por demostra esey cu e testimonio di nan bida.
Cuanto tata bo no ta haya awendia ta baha nan famia na porta di iglesia, of misa, tempel, e luga caminda e famia ta bay adora Dios, pero nan mes no ta drenta. No pasobra nan ta malo of tin di bay traha, pero nan no kier sirbi Dios. Nan ta ocupa den e cosnan di mundo. Pasobra e excuus di bisa mi no ta cla, a bay for di moda. Pasobra Cristo por bini den un momento of otro y e ora ey tampoco como tata lo bo no ta cla. Hende tin cu stop di laga diabel gaña nan.
Den 2 Cronicanan capitulo 28: 9, Rey David ta bisa lo siguiente na su yiu Salomon: Pa loke ta abo mi yiu Salomon, conoce e Dios di bo tata, y sirbie cu henter bo curason, y cu un alma boluntario, pasobra Señor ta scrutiña tur curason y ta comprende tur intencion di e pensamentonan. Si bo busc’E , E lo laga bo hay’E , ma si bo bandon’E, E lo rechasa bo pa semper.
David tabatin gran experiencia cu Dios, for di ora e tabata hoben te den e ultimo dianan di su bida. E tabata un wardado di carne, despues urgi como rey.
David a mata Goliat, David tabata persigui door di Saul. David tabata un gran guerero. David a huy for di Saul y nunca a lanta su man contra Saul. David a cay den adulterio cu Betsabe. Dios a saca su pica na claridad. Dios a pordona David,pero e consecuencia di su pica tabata grave p’e y su famia.
David a arepenti di su maldad y a sigui sirbi Dios.
E hobennan di awendia mester mira y reconoce e gran beneficio ora nan mayornan ta sirbi Dios di curason. Pa nan tambe tuma e decision di sirbi Dios.
Sinceramente,
Pastoor Marcel Balootje.
