Siman pasa tres fraccion den oposicion esta MAS, ACCION 21 y AVP a acerca Gobernador di Aruba, Su Excelencia Alfonso Boekhoudt como tambe presidente di parlamento, Edgard Vrolijk cu un peticion pa gobierno trek in presupuesto 2023.
Gobierno di Aruba, dialuna mainta a contesta e carta di MAS, ACCION 21 y AVP basa riba tur e argumentonan huridico y tecnico cu nan ponencia no por wordo teni cuenta cu ne y basicamente pasobra cu nan ponencia ta absurdo. Den e carta cu gobierno a manda pa parlamento, ta separa tres argumento cu e partidonan den oposicion a uza. Prome Minister Evelyn Wever-Croes y Minister di Finansa, Xiomara Maduro den Conferencia di Prensa dialuna mainta a elabora riba e contestanan di Gobierno di Aruba na oposicion.
ARGUMENTO 1: CAFT: No por a manda e presupuesto pa Parlamento pasobra gobierno mester a pidi CAFT un conseho di nobo despues cu a dicidi di pospone introduccion di BTW.
E argumento aki no tin ningun base huridicamente. E ley di LAFT, articulo 10 ta stipula cu Minister di Finansas por dicidi si e ta pidi CAFT conseho riba un ‘ontwerp begroting’. Pasobra e ley ta stipula cu e minister mester pidi un conseho unabes parlamento aproba e presupuesto. Si e minister dicidi di haci esaki prome cu e manda e presupuesto parlamento, e ta un prerogativo di e minister. E no ta obliga di hacie pero si e ta obliga di haci esaki despues cu parlamento aprob’e, pasobra parlamento por bin cu cambio na caminda y gobierno tambe por bin cu nota di cambio durante tratamento.
“Pues nan argumneto cu nos a viola e ley di LAFT y no laga CAFT duna un conseho di nobo, no ta un argumento valido”, prome minister a enfatisa.
ARGUMENTO 2: Raad van Advies: Gobierno mester a bay bek Raad van Advies (RvA) mirando cu a cambia e decision di no bin cu un BTW pero bin cu un aumento di BBO.
Esaki tampoco ta un argumento valido pasobra RvA ta reconoce tambe cu e presupuesto ta un documento di un maneho di gobierno y aki gobierno ta stipula kico ta su gastonan y su compromisonan financiero y esey ta loke gobierno ta pone y ancra den un presupuesto. RvA ta wak con gobierno lo genera entrada pa cubri su gastonan y si e entradanan ta realistico. Pero cua entradanan gobierno ta uza pa cover su gastonan, esey no ta un prerogativo di RvA pa duna conseho den un presupuesto.
E gran parti di entrada di gobierno ta bin door di impuesto y cualkier impuesto cu bin, esey no ta e esencia di conseho di Raad van Advies ora di presupuesto. E enfasis di Raad van Advies ta riba e gastonan y e compromisonan financiero cu gobierno ta haci. Ademas ora cu gobierno bin cu un cambio di un impuesto, si ta BTW of aumento di BBO, e ley ey ta cana su caminda, e lo yega RvA y aki ta na unda nan lo duna nan conseho riba e cambio di ley manera cu ley ta stipula.
Ademas den e ‘nader rapport’ cu gobierno a manda hunto cu e presupuesto, obviamente e lidernan di oposicion no a les’e ni studie, pero aki gobierno a duna na forma substancia pakico no ta sigui cu e introduccion di BTW mas entrante 1 di januari 2023 y a mustra cu cifra y cu detaye kico a bin na su luga. Tur esaki ta poni den e presupuesto cu a bay parlamento caba. Pues esaki tampoco ta motibo pa gobierno trek in e presupuesto.
ARGUMENTO 3: E di tres argumento ta cu e derecho di parlamento pa cuestiona y pa yuda traha un presupuesto ta wordo mina.
Esaki tampoco ta corecto. E budget recht di parlamento primeramente ta dirigi riba e gastonan y compromisonan financiero di gobierno y e autorisacion cu parlamento ta duna gobierno ta pa por haci e gastonan y no e entradanan. Gobierno mester indica si na unda lo haya entradanan pa parlamento tin un bista den totalidad. Pero mester corda cu entradanan ta calculacionnan cu Gobierno ta estima cu por varia y fluctua durante aña. Aki tambe ta conta cu mayoria entrada di gobierno ta via entrada di impuesto sea un BTW of BBO pero esaki no ta mishi cu e derecho fundamental cu un parlamento tin.
Tin cu corda tambe cu pa bin cu tur impuesto mester tin un ley separa. No ta e presupuesto ta duna gobierno e autorisacion pa bin cu impuesto. Ta un ley, art 5.11 di nos constitucion cu ta bisa cu pa bin cu impuesto mester un ley separa, e ley lo cana su caminda y lo bay RvA tambe. Pues a base di esaki gobierno no lo trek in presupuesto 2023 y gobierno a duna parlamento tur argumento huridico y tecnico pa mustra cu e ponencianan di oposicion no tin ningun base.
Prome minister ta pidi oposicion pa stop di purba kibra tur cos cu ta bayendo bon. Aruba merece un bon gobierno y un parlamento cu ta constructivo pa hiba e pais aki bay dilanti.
