Wardacosta ta informa doñonan di boto y seadoo pa tene cuenta pa nan tin nan documentonan valido a bordo cual ta, ‘vaarvergunning’ y ‘vaarbewijs’ di e capitan. Zorg pa tin vest di salbabida pa tur tripulacion y pasahero abordo; no por bay cu pasahero di mas abordo di e boto pa evita situacion peligroso.
Importante tambe pa informa famia unda bo ta bay cu bo boto, pa na momento cu un situacion peligroso presenta, famia sa unda bo ta i asina por informa Wardacosta debidamente. Ta bon pa botonan tin un lifering y importante pa botonan tin nan anker cu suficiente cabuya a bordo.
Wardacosta lo t’ey presente cu diferente di su botonan nan durante Siman Santo riba lama pa por haci e parti di vigilancia y brinda siguridad maritimo. Vigilancia riba cuido di naturalesa tambe ta parti di control di Wardacosta. Area nan cual Wardacosta lo vigila ta San Nicolasbaai – Commandeursbaai, Barcadera haven/Lagoen, Spaans Lagoen, High rise Hotel-Arashi-Lighthouse, Rincon, diferente Rif, Baby Beach y Eagle Beach.
Wardacosta ta avisa tur doño di boto pa laga haci mantencion na nan boto. Zorg pa bo tin suficiente medionan di siguridad y ekipo di rescate na bordo, manera: zwemvest, EHBO kit, suficiente awa, aparato pa paga candela, radio VHF of telefon celular cu bateria full carga. Asina por minimalisa e chens cu bo boto ta daña na caminda y cu bo haya bo den un situacion peligroso riba lama cu bo boto y bo pasaheronan. Den caso cu bo mester di yudansa, bo por yama Wardacosta riba e number 913 of Whatsapp 005999 510 0913.
